തിരുവനന്തപുരം : തിരുവനന്തപുരം- കാസര്കോട് അര്ധ അതിവേഗ റെയില് പദ്ധതിക്ക് (സില്വര് ലൈന്) എതിരായ ജനകീയ പ്രതിഷേധം ‘കാവല് പദ്ധതി’യുടെ മറവില് അടിച്ചൊതുക്കാന് ആഭ്യന്തര വകുപ്പ്. സാമൂഹിക വിരുദ്ധര്, ഗുണ്ടകള്, മണ്ണ്-മയക്കുമരുന്ന് മാഫിയ, ക്വട്ടേഷന് സംഘാംഗങ്ങള് എന്നിവരെ പിടികൂടാന് ഡി.ജി.പി ആരംഭിച്ച ‘ഓപറേഷന് കാവല്’ പദ്ധതിയാണ് മനുഷ്യാവകാശ, സാമൂഹിക, പരിസ്ഥിതി പ്രവര്ത്തകര് മുതല് രാഷ്ട്രീയ പ്രവര്ത്തനം പോലുമില്ലാത്ത സ്ത്രീകളെവരെ കുടുക്കാന് ഉപയോഗിക്കുന്നത്. സില്വര് ലൈനിനെ എതിര്ക്കുന്ന സാമൂഹിക-പരിസ്ഥിതി പ്രവര്ത്തകരുടെ ആധാര് കാര്ഡ്, വിലാസം, സമൂഹ മാധ്യമ അക്കൗണ്ട് വിവരങ്ങള് തുടങ്ങിയവ പോലീസ് ശേഖരിക്കുന്നുണ്ട്.
ഇവരെ ഗുണ്ടാപട്ടികയില്പെടുത്തുക മാത്രമല്ല, നേരിട്ട് വിളിച്ച് ഭീഷണിപ്പെടുത്തുകയും ചെയ്യുന്നു. സ്വകാര്യ സ്ഥാപന ജീവനക്കാര്, കോളേജ് അധ്യാപകര്, ഗവേഷക വിദ്യാര്ഥികള് അടക്കമുള്ളവര് ഗുണ്ടാപട്ടികയില്പ്പെട്ടു. പലരും ജോലി നഷ്ടമാകുമെന്ന ഭയത്താലും ഒറ്റപ്പെടുമെന്ന ആശങ്കയാലും വിവരം പുറത്തുപറയാതിരിക്കുകയാണ്. ജനകീയസമരം അടിച്ചമര്ത്താന് നിയമവിരുദ്ധവും രാഷ്ട്രീയ പ്രേരിതവുമായ മാര്ഗം മുമ്പും സര്ക്കാര് സ്വീകരിച്ചതായി ആരോപണമുയര്ന്നിരുന്നു. ഗെയില് പൈപ്പ് ലൈനിന് എതിരായ സമരത്തെ ഒറ്റപ്പെടുത്താന് ഇസ്ലാമിക തീവ്രവാദമെന്ന ആക്ഷേപം ഒന്നാം പിണറായി സര്ക്കാര് ഉന്നയിച്ചിരുന്നു.
