കണ്ണൂര്: മുഖ്യമന്ത്രി പിണറായി വിജയന്റെ പിപ്പിടിവിദ്യയും പ്രത്യേക ഏക്ഷനുമൊക്കെ അതുകണ്ട് പേടിക്കുന്ന അടിമകളോട് കാണിച്ചാല് മതിയെന്ന് കെ.പി.സി.സി പ്രസിഡന്റ് കെ.സുധാകരന്. കേരളത്തിന് കേള്ക്കേണ്ടത് പ്രതിപക്ഷം ഉന്നയിക്കുന്ന ചോദ്യങ്ങള്ക്കുള്ള ഉത്തരങ്ങളാണ്. എണ്ണമറ്റ ഉപദേശികളില് വിവരമുള്ള ഒരാളെങ്കിലും ഉണ്ടെങ്കില് അയാളോട് ചോദിച്ച് ഒരുത്തരം തയ്യാറാക്കി നിയമസഭയില് വരിക.
അല്ലാത്തപക്ഷം സഭയില് ഉയരുന്ന ചോദ്യങ്ങള്ക്ക് മുന്പില് ഇളിഭ്യനായി ഇനിയും കുറേയധികം കാലം നില്ക്കേണ്ടി വരും. പാറപ്രത്തെ പഴയ ഗുണ്ടാശൈലിയില് ആക്രോശിച്ചാല് കൂടെ ഇരിക്കുന്ന പുതുതലമുറയിലെ സി.പി.എം എം.എല്.എമാര്ക്ക് പോലും ചിരിയാകും വരിക -സുധാകരന് ഫേസ്ബുക് പോസ്റ്റില് പറഞ്ഞു. നിയമസഭയില് മാത്യു കുഴല്നാടന് പറഞ്ഞതിനെ സാധൂകരിക്കുന്ന തെളിവുകള് അദ്ദേഹം പുറത്ത് വിട്ടിട്ടുണ്ട്. ഇനി മറുപടി പറയേണ്ടത് മുഖ്യമന്ത്രിയാണ്. പഴഞ്ചൊല്ലുകളും പഞ്ചതന്ത്രകഥകളും കേരളത്തിലെ ഓരോ കൊച്ചുകുട്ടിക്കും കാണാപാഠമാണ്. ഇനിയും അവയെ ആശ്രയിച്ച് മലയാള സാഹിത്യത്തെ അപമാനിക്കരുത്.
കൊലയാളിക്കും കൊള്ളക്കാരനും ജനങ്ങളെ കബളിപ്പിക്കാന് എടുത്തുപയോഗിക്കാനുള്ള ആയുധങ്ങളല്ല അവയെന്നും സുധാകരന് പറഞ്ഞു. ‘പിണറായി വിജയനെന്ന പെരും നുണയനെ പൊതുസമൂഹത്തിന് മുന്നില് തുറന്നു കാണിച്ച മാത്യു കുഴല്നാടന് എം.എല്.എയ്ക്ക് അഭിവാദ്യങ്ങള്’ എന്ന കുറിപ്പോടെ അവസാനിക്കുന്ന ഫേസ്ബുക് പോസ്റ്റില് മാത്യു കുഴല്നാടനും സുധാകരനും ഒപ്പമിരിക്കുന്ന ഫോട്ടോയും പോസ്റ്റ് ചെയ്തിട്ടുണ്ട്.