കോഴിക്കോട് : ജനവികാരത്തിന് മുമ്പില് മുട്ടു മടക്കിയത് കൊണ്ടാണെന്ന് സില്വര്ലൈന് കല്ലിടല് നിര്ത്തിവെക്കാന് സംസ്ഥാന സര്ക്കാര് തിരുമാനിച്ചതെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. കേന്ദ്രസര്ക്കാരിന്റെ അനുമതി ലഭിക്കില്ലെന്ന് മനസിലായതോടെ സില്വര്ലൈന് യാഥാര്ത്ഥ്യമാവില്ലെന്ന് സംസ്ഥാന സര്ക്കാരിന് ഉറപ്പായിരുന്നു. ചെയ്തുപോയ തെറ്റുകള്ക്ക് മുഖ്യമന്ത്രി ജനങ്ങളോട് മാപ്പു പറയുകയും പ്രതിഷേധക്കാര്ക്കെതിരെ എടുത്ത കേസുകള് പിന്വലിക്കാന് തയ്യാറാവുകയും ചെയ്യണം. സില്വര്ലൈന് വിഷയം ഉയര്ത്തി തൃക്കാക്കര ഉപതിരഞ്ഞെടുപ്പിനെ നേരിടുമെന്ന് പറഞ്ഞ പിണറായി വിജയന് നേരം വെളുക്കുമ്പോഴേക്കും ബോധോദയമുണ്ടായത് നല്ല കാര്യമാണ്. സില്വര്ലൈനിനെതിരാണ് ജനവികാരമെന്ന് വോട്ട് അഭ്യര്ത്ഥിച്ച് വീടുകളിലെത്തിയ മന്ത്രിമാര്ക്ക് ബോധ്യമായതായും സുരേന്ദ്രന് വ്യക്തമാക്കി.
