കൊച്ചി : കോളിളക്കം സൃഷ്ടിച്ച കാക്കനാട് മയക്കുമരുന്ന് കേസില് കുറ്റപത്രം സമര്പ്പിച്ചു. എറണാകുളം സെഷന്സ് കോടതിയിലാണ് എക്സൈസ് ക്രൈംബ്രാഞ്ച് ഇന്നു കുറ്റപത്രം സമര്പ്പിച്ചത്. നാലായിരത്തിനു മുകളില് പേജുകളുള്ളതാണ് കുറ്റപത്രം. കേസില് 25 പ്രതികളാണുള്ളത്. ഇതില് ഇതുവരെ 19 പേരെ അറസ്റ്റ് ചെയ്തിട്ടുണ്ട്. ഒന്നാം പ്രതി മുഹമ്മദ് ഫവാസ്, രണ്ടാം പ്രതി ശ്രീമോന്, മൂന്നാം പ്രതി മുഹമ്മദ് അജ്മല്, നാലാം പ്രതി അഫസല് മുഹമ്മദ്, അഞ്ചാം പ്രതി ശബ്ന മനോജ് എന്നിങ്ങനെ പ്രതിപട്ടിക നീളുന്നു. ആദ്യം രജിസ്റ്റര് ചെയ്ത കേസിലാണ് കുറ്റപത്രം സമര്പ്പിക്കുന്നത്. 84 ഗ്രാം മെത്താഫെറ്റാമിന് മയക്കുമരുന്നു പിടികൂടിയ കേസാണിത്. രണ്ടാമത്തെ കേസില് അന്വേഷണം പുരോഗമിക്കുകയാണ്. സിഡിആര് രേഖകള്, മൊബൈല് ഫോണ്, ബാങ്ക് അക്കൗണ്ട് വിവരങ്ങള് എന്നിവയാണ് പ്രതികള്ക്കെതിരായ നിര്ണായക തെളിവുകള്.
2021 ഓഗസ്റ്റ് 19നാണ് കാക്കനാട്ടെ അപ്പാര്ട്ട്മെന്റിനിന്നു മയക്കുമരുന്നു പിടികൂടിയത്. അന്ന് ഏഴുപേരെ കസ്റ്റഡിയില് എടുത്തിരുന്നു. ഇവരില്നിന്നു ലഭിച്ച വിവരങ്ങളുടെ അടിസ്ഥാനത്തില് നടത്തിയ തുടര് റെയ്ഡില് 1.085 കിലോ ഗ്രാം മെത്താഫെറ്റാമിന് എറണാകുളം എക്സൈസ് സ്പെഷല് സ്ക്വാഡ് പിടികൂടുകയുണ്ടായി. കൊച്ചിയിലെ സംഘത്തിനു മയക്കുമരുന്ന് കൈമാറിയത് തൊണ്ടിയാര്പേട്ട് സ്വദേശി ഷംസുദീന് സേട്ട് ആണെന്ന് എക്സൈസ് ക്രൈംബ്രാഞ്ച് സംഘം കണ്ടെത്തിയിരുന്നു. കേസിലെ 25-ാം പ്രതിയാണ് ഇയാള്.
