കൊച്ചി : സിസിടിവി ദൃശ്യങ്ങള് പുറത്തുവിടാന് കളമശേരി മെഡിക്കല് കോളേജിനെ വെല്ലുവിളിച്ച് മോന്സനെതിരായ പോക്സോ കേസിലെ പരാതിക്കാരി. വൈദ്യപരിശോധനയ്ക്കിടെ ഡോക്ടര്മാര് ഭീഷണിപ്പെടുത്തിയെന്നും മുറിയില് പൂട്ടിയിട്ടെന്നും പെണ്കുട്ടിയുടെ ബന്ധു ആരോപിച്ചു. സുരക്ഷാ ജീവനക്കാരും തടഞ്ഞുവയ്ക്കാന് ശ്രമിച്ചു. മോന്സന്റെ മകന് പഠിക്കുന്ന കോളേജാണെന്നും കേസ് അട്ടിമറിക്കാനുള്ള ശ്രമമാണ് ഉണ്ടായതെന്നും ആരോപിച്ചു.
മെഡിക്കല് കോളേജ് അധികൃതര് പറയുന്നതെല്ലാം കള്ളമാണ്. ലേബര് റൂമില് പൂട്ടിയിട്ടുള്ള ചോദ്യം ചെയ്യലായിരുന്നു നടന്നത്. പെണ്കുട്ടിയെ അപമാനിക്കും വിധമായിരുന്നു മൂന്ന് വനിതാ ഡോക്ടര്മാരുടെയും പെരുമാറ്റം. പോലീസുകാര് പോലും ചോദിക്കാത്ത ചോദ്യങ്ങള് ഉന്നയിച്ചതോടെ പരാതിക്കാരി ഇരുന്ന് കരഞ്ഞു.
വൈദ്യപരിശോധന വേണ്ടെന്നും മടങ്ങണമെന്നും പറഞ്ഞതോടെ മുറിയില് പൂട്ടിയിട്ടു. തുറക്കാന് ശ്രമിച്ചപ്പോള് കൈ ബലമായി തട്ടിമാറ്റി. ഒടുവില് ഒരുവിധം മുറി തുറന്ന് പുറത്തേക്ക് ഓടുകയായിരുന്നു. കാത്തു നിന്ന രണ്ട് വനിതാ പോലീസുകാര്ക്കൊപ്പമാണ് പുറത്തെത്തിയത്. പുറകെ വന്ന ഡോക്ടര്മാര് ആക്രോശിച്ചതോടെ സെക്യൂരിറ്റി ജീവനക്കാരും തടയാന് ശ്രമിച്ചു.