തൊടുപുഴ: മൂലമറ്റം കാഞ്ഞാറിലുണ്ടായ ഉരുള്പൊട്ടലില് കാണാതായ അഞ്ചുപേരുടേയും മൃതദേഹങ്ങള് കണ്ടെടുത്തു. ഇന്ന് പുലര്ച്ചെയുണ്ടായ ഉരുള്പൊട്ടലില് ചിറ്റടിച്ചാലില് സോമന്റെ വീടാണ് ഒലിച്ചു പോയത്. സോമന്, ഭാര്യ ജയ, സോമന്റെ അമ്മ തങ്കമ്മ, മകള് ഷിമ, ഷിമയുടെ മകന് നാലുവയസുള്ള ദേവനന്ദു എന്നിവരാണ് മരിച്ചത്. തങ്കമ്മയുടെ മൃതദേഹമണ് ആദ്യം കണ്ടെത്തിയത്. തുടര്ന്ന് ദേവനന്ദുവിന്റെയും ഷിമയുടേയും കണ്ടെത്തി. പിന്നീടാണ് സോമന്റെയും ഭാര്യ ജയയുടേയും മൃതദേഹങ്ങള് കണ്ടെടുത്തത്. വീട് നിലനിന്നിരുന്ന സ്ഥലത്ത് നിന്ന് താഴെയായാണ് മൃതദേഹങ്ങള് കണ്ടെടുത്തത്.
സംഗമം കവലയ്ക്ക് സമീപം ഇന്ന് പുലര്ച്ചെ മൂന്നരയോടെയാണ് ഉരുള്പൊട്ടലുണ്ടായത്. ഉരുള്പൊട്ടലിലും മലവെള്ളപ്പാച്ചിലിലും വീടിരുന്ന പ്രദേശം ആകെ ഒലിച്ചുപോയി. രാത്രി ആരംഭിച്ച ശക്തമായ മഴ രാവിലെ അല്പം ശമിച്ചിട്ടുണ്ട്. പോലീസും ഫയര്ഫോഴ്സും നാട്ടുകാരും ചേര്ന്ന് രക്ഷാ പ്രവര്ത്തനം തുടരുകയാണ്. റവന്യൂവകുപ്പും സ്ഥലത്തുണ്ട്. തെരച്ചിലിനായി തൃശൂരില് നിന്ന് എന്ഡിആര്എഫ് സംഘം സംഭവ സ്ഥലത്തേക്കെത്തിയിരുന്നു.
