കരിപ്പൂര് : എയര് ഇന്ത്യ എക്സ് പ്രസ് IX1344 ഓഗസ്റ്റ് 7 ന് കരിപ്പൂരില് ക്രാഷ് ലാന്ഡിങ് നടത്തുന്നതിന് ഏകദേശം രണ്ട് മണിക്കൂര് മുന്പ് ഇന്ഡിഗോ വിമാനം ഇതേ ടേബിള് ടോപ്പ് വിമാനത്താവളത്തില് സമാനമായ ടച്ച്ഡൗണ് നടത്തേണ്ടിവന്നിരുന്നു. ഇന്ഡിഗോ ഫ്ലൈറ്റ് 6 ഇ 7129 ബെംഗളൂരുവില് നിന്ന് വരികയായിരുന്നു. എയര് ഇന്ത്യ എക്സ് പ്രസ് വിമാനം എത്തുന്നതിന് 1.45 മണിക്കൂര് മുന്പായിരുന്നു ഇന്ഡിഗോയുടെ ലാന്ഡിങ് ഷെഡ്യൂള് ചെയ്തിരുന്നത്.
ഇന്ഡിഗോ എടിആര് വിമാനത്താവളത്തിലെ റണ്വേ 10-ല് ഇറങ്ങുന്നതിന് മുന്പ് അപകടത്തില്പെട്ട വിമാനത്തിന്റെ സമാനമായ അതേ വഴിയായിരുന്നു പിന്തുടര്ന്നതെന്ന് വ്യവസായ വിദഗ്ധനും ലണ്ടനിലെ റോയല് എയറോനോട്ടിക്കല് സൊസൈറ്റിയുടെ ഫെലോയുമായ അമിത് സിങ് ചൂണ്ടിക്കാട്ടുന്നു. ഇക്കാര്യം അന്നത്തെ ഫ്ലൈറ്റ് റഡാര് ട്രാക്കിങ് ഡേറ്റകളിലും മാപ്പുകളിലും വ്യക്തമാണ്.
എയര് ഇന്ത്യ എക്സ് പ്രസ് രണ്ടാമത്തെ ലാന്ഡിങ് ശ്രമം നടത്തിയോ ഇല്ലയോ എന്നതിനെക്കുറിച്ച് പരസ്പര വിരുദ്ധമായ റിപ്പോര്ട്ടുകള് ഉണ്ട്. എന്നാല് പിന്നീട് അത് ഇറങ്ങാന് റണ്വേ 10 നെയാണ് സമീപിച്ചതെന്ന് വ്യക്തമാണ്. സമാനമായ ഒരു ഫ്ലൈറ്റ് പാതയില് ഇന്ഡിഗോ തുടക്കത്തില് റണ്വേ 28 ലാന്ഡുചെയ്യാന് ശ്രമിച്ചിരുന്നുവെങ്കിലും ലാന്ഡിങ് ഉപേക്ഷിക്കുകയായിരുന്നു. രാത്രി 7.40 ന് എത്തിച്ചേരേണ്ട എയര് ഇന്ത്യ എക്സ് പ്രസ് വിമാനം റണ്വേ 28 ല് ഇറങ്ങാനുള്ള ആദ്യ ശ്രമം ഉപേക്ഷിച്ചിരുന്നു.
