തിരുവനന്തപുരം: സംസ്ഥാനത്ത് അടുത്ത മണിക്കൂറുകളില് ശക്തമായ മഴ സാധ്യതയെന്ന് കാലാവസ്ഥ നിരീക്ഷണ കേന്ദ്രം. തെക്കന് കേരളത്തിലാണ് കനത്ത മഴയ്ക്ക് സാധ്യത. അടുത്ത മൂന്ന് മണിക്കൂറില് തിരുവനന്തപുരം, കൊല്ലം, പത്തനംത്തിട്ട, ആലപ്പുഴ, ഇടുക്കി, എറണാകുളം, തൃശൂര്, പാലക്കാട് എന്നീ ജില്ലകളിലെ ഒറ്റപ്പെട്ടയിടങ്ങളില് ഇടിമിന്നലോട് കൂടിയ മിതമായ മഴയ്ക്കും മണിക്കൂറില് 40 കി മീ വരെ വേഗതയില് വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ടെന്ന് മുന്നറിയിപ്പില് പറയുന്നു.
അതേസമയം കോഴിക്കോട് കോടഞ്ചേരിയില് ശക്തമായ മഴയെ തുടര്ന്ന് മലവെള്ളപ്പാച്ചിലുണ്ടായി. പുഴയില് കുടുങ്ങിയ രണ്ടുപേരെ നാട്ടുകാരാണ് സാഹസികമായി രക്ഷപ്പെടുത്തിയത്. മലപ്പുറം താനൂര് സ്വദേശികളായ രണ്ടുപേരാണ് പുഴയില് കുടുങ്ങിയത്. അതേസമയം കനത്ത മഴയെ തുടര്ന്ന് കോഴിക്കോട് തിരുവമ്പാടി പുന്നയ്ക്കല് വഴിക്കടവില് നിര്മ്മിച്ച താത്കാലിക പാലം ഒലിച്ചുപോയി. കൂടരഞ്ഞി, താമരശേരി, തിരുവമ്പാടി, തുടങ്ങിയ പ്രദേശങ്ങളില് ശക്തമായ മഴ തുടരുകയാണ്. മറ്റ് ചില ഇടങ്ങളില് മണ്ണിടിച്ചിലും ഉണ്ടായിട്ടുണ്ട്.
