ന്യൂഡല്ഹി : കുല്ഭൂഷണ് ജാദവ് കേസില് കേന്ദ്ര സര്ക്കാര് അന്താരാഷ്ട്ര കോടതിയെ സമീപിക്കണമെന്ന് ആവശ്യപ്പെട്ട് കോണ്ഗ്രസ്. പാക് സൈനികകോടതിയുടെ വധശിക്ഷാ വിധിക്കെതിരേ ഇസ്ലാമാബാദ് ഹൈക്കോടതിയില് പുനഃപരിശോധനാ ഹര്ജി സമര്പ്പിക്കാന് കുല്ഭൂഷന് ജാദവ് വിസമ്മതിച്ചായുള്ള വാര്ത്തകള് പുറത്തുവന്നതിനു പിന്നാലെയാണ് കോണ്ഗ്രസിന്റെ പ്രതികരണം.
കേസില് പാകിസ്ഥാനില്നിന്നും പ്രത്യേകിച്ചൊന്നും ഇനി പ്രതീക്ഷിക്കേണ്ടതില്ലെന്നും കോണ്ഗ്രസ് വക്താവ് മനു അഭിഷേക് സിംഗ്വി പറഞ്ഞു. ഇപ്പോള് നാം കേന്ദ്രസര്ക്കാരില് വിശ്വാസം അര്പ്പിച്ചേ മതിയാകൂ. കുല്ഭൂഷന് ജാദവിന് നിയമപരമായ അവകാശങ്ങള് ലഭിക്കുന്നുണ്ടെന്ന് ഉറപ്പുവരുത്താന് സാധിക്കണം. ഇതിനായി സര്ക്കാര് അന്താരാഷ്ട്ര നീതിന്യായ കോടതിയെ സമീപിക്കണമെന്നും സിംഗ്വി ആവശ്യപ്പെട്ടു.
നേരത്തേ, പാക്കിസ്ഥാന്റെ വാദം തള്ളി വിദേശകാര്യ വക്താവ് അനുരാഗ് ശ്രീവാസ്തവ രംഗത്തെത്തിയിരുന്നു. പുനഃപരിശോധനാ ഹര്ജി നല്കാതിരിക്കാന് പാക്കിസ്ഥാന് അധികൃതര് ജാദവിനെ ഭീഷണിപ്പെടുത്തിയെന്നു വ്യക്തമാണെന്നു ശ്രീവാസ്തവ പറഞ്ഞു.
2017 ലാണ് ചാരവൃത്തി ആരോപിച്ച് ഇന്ത്യന് പൗരനും മുന് നാവികസേനാ ഉദ്യോഗസ്ഥനുമായ ജാദവിനെ പാക്കിസ്ഥാന് വധശിക്ഷ വിധിച്ചത്. ജാദവ് ദയാഹര്ജി ഫയല് ചെയ്യാന് തീരുമാനിച്ചതായി ഡോണ് ന്യൂസ് റിപ്പോര്ട്ട് ചെയ്തു. 2016 മാര്ച്ച് മൂന്നിനാണ് ജാദവിനെ പാക്കിസ്ഥാന് അറസ്റ്റ് ചെയ്തത്. അതേസമയം, ഇറാനില്നിന്ന് തട്ടിക്കൊണ്ടു വന്നതാണെന്ന് ഇന്ത്യ വാദിക്കുന്നു.
