മാവേലിക്കര : ആണ്വേഷത്തില് കഴിയുന്ന യുവതിയെ പോക്സോ കേസില് അറസ്റ്റ് ചെയ്തു. തിരുവനന്തപുരം വീരണക്കാവ് കൃപാനിലയത്തില് സന്ധ്യ (27) ആണ് അറസ്റ്റിലായത്. പ്ലസ്വണ് വിദ്യാര്ഥിനിയെ സമൂഹമാധ്യമത്തിലൂടെ പരിചയപ്പെട്ട ശേഷം വീട്ടില്നിന്നു വിളിച്ചിറക്കി കൊണ്ടുപോയ കേസിലാണു പ്രതിയെ പോക്സോ വകുപ്പ് പ്രകാരം അറസ്റ്റ് ചെയ്തത്. പെണ്കുട്ടി മാവേലിക്കര സ്വദേശിനിയാണ്.
അറസ്റ്റിലായ പ്രതി സന്ധ്യ വിവാഹിതയും ഒരു കുട്ടിയുടെ അമ്മയുമാണ്. പുരുഷനെന്ന് പരിചയപ്പെടുത്തിയാണ് സന്ധ്യ പെണ്കുട്ടിയുമായി സൗഹൃദത്തിലാകുകയും തട്ടിക്കൊണ്ടുപോകുകയും ചെയ്തതെന്നും പോലീസ് വ്യക്തമാക്കി. സമൂഹമാധ്യമങ്ങളില് സൗഹൃദ ഗ്രൂപ്പുകളുണ്ടാക്കി പെണ്കുട്ടികളുടെ സ്വകാര്യ വിഷമങ്ങള് പറയാന് പ്രേരിപ്പിച്ച് അടുപ്പമുണ്ടാക്കുകയായിരുന്നു ഇവരുടെ രീതിയെന്ന് പോലീസ് പറഞ്ഞു. സൈബര് സെല്ലിന്റെ സഹായത്തോടെ സമൂഹമാധ്യമ അക്കൗണ്ടില് നിന്ന് യഥാര്ഥ പേരും ഫോണ് നമ്പറും കണ്ടെത്തുകയായിരുന്നു.
പോലീസ് പിടികൂടുന്നതു വരെയും ഒപ്പമുള്ളത് സ്ത്രീയാണെന്നു മനസ്സിലായില്ലെന്നു വിദ്യാര്ത്ഥിനി പറഞ്ഞതായും പോലീസ് വെളിപ്പെടുത്തി. സമൂഹമാധ്യമത്തില് ചന്തു എന്ന വ്യാജ പേരിലുള്ള അക്കൗണ്ടിലാണ് വിദ്യാര്ത്ഥിനിയുമായി സൗഹൃദമുണ്ടാക്കിയത്. 9 ദിവസം മുന്പാണ് പെണ്കുട്ടിയെ കാണാതായത്. പെണ്കുട്ടിയുടെ പക്കലുണ്ടായിരുന്ന പണവും സ്വര്ണവും സന്ധ്യ കൈക്കലാക്കിയെന്നും പോലീസ് പറഞ്ഞു. ഒരാഴ്ച നീണ്ട അന്വേഷണത്തിനൊടുവില് തൃശൂരില് നിന്നാണു പ്രതിയെ പിടികൂടിയത്. അറസ്റ്റിലായ സന്ധ്യയുടെ പേരില് 2016ല് 14 വയസുള്ള പെണ്കുട്ടികളെ ഉപദ്രവിച്ചതിനു കാട്ടാക്കട സ്റ്റേഷനില് രണ്ടു പോക്സോ കേസുകള് നിലവിലുണ്ടെന്നു പോലീസ് പറഞ്ഞു.
