കൊച്ചി : കിഴക്കമ്പലത്ത് പോലീസിനെ ആക്രമിച്ച കേസില് നിസാര വകുപ്പുകള് ചുമത്തപ്പെട്ട 123 തൊഴിലാളികളെ തിരിച്ചെടുക്കുമെന്ന് കിറ്റെക്സ് കമ്പനി. അന്തിമകുറ്റപത്ര൦ സമര്പ്പിച്ച കേസില് നിയമോപദേശം അനുസരിച്ചാണ് നടപടിയെന്ന് കമ്പനി അറിയിച്ചു. തൊഴിലാളികളുടെ കുടുംബത്തിന് അടിയന്തര സഹായം നല്കാനും കമ്പനി തീരുമാനിച്ചിട്ടുണ്ട്. കിഴക്കമ്പലത്ത് ക്രിസ്തുമസ് ആഘോഷത്തിനിടെയാണ് കിറ്റെക്സിലെ അതിഥി തൊഴിലാളികള് പോലീസിനെ ആക്രമിച്ചത്.
തൊഴിലാളികള് ഒരു പോലീസ് ജീപ്പ് കത്തിക്കുകയും രണ്ട് ജീപ്പുകള് അടിച്ച് തകര്ക്കുകയും ചെയ്തു. കിറ്റെക്സ് കമ്പനിയിലെ ഇതര സംസ്ഥാന തൊഴിലാളികള് ലേബര് ക്യാമ്പിനുള്ളില് ക്രിസ്തുമസ് കരോള് നടത്തിയിരുന്നു. മദ്യലഹരിയില് ഇവര് തമ്മില് തര്ക്കം ഉണ്ടായി. തര്ക്കം പിന്നീട് റോഡിലേക്കും നീണ്ടു. ഇതിനിടെ നാട്ടുകാരും ഇടപെട്ട സ്ഥിതിഗതികള് വഷളായതോടെ പോലീസില് വിവരം അറിയിക്കുകയായിരുന്നു. എന്നാല് സ്ഥലത്തെത്തിയ കുന്നത്ത് നാട് ഇന്സ്പെക്ടര്ക്കും സംഘത്തിനും നേരെ തൊഴിലാളികള് അക്രമം അഴിച്ചുവിടുകയായിരുന്നു.
