കൊച്ചി : കിറ്റെക്സ് കമ്പനി ജീവനക്കാര് പോലീസിനെ ആക്രമിച്ച കേസിലെ 4 പ്രതികളെ കോടതി 3 ദിവസത്തേക്ക് പോലീസ് കസ്റ്റഡിയില് വിട്ടു. പോലീസിന്റെ അപേക്ഷ പരിഗണിച്ചാണ് കോലഞ്ചേരി ജുഡീഷ്യല് ഒന്നാം ക്ലാസ്സ് മജിസ്ട്രേറ്റ് കോടതിയുടെ നടപടി. സിഐയെ ആക്രമിച്ചതുമായി ബന്ധപ്പെട്ട് രജിസ്റ്റര് ചെയ്ത കേസിലെ ആദ്യ 4 പ്രതികളെയാണ് പോലീസിന് കസ്റ്റഡിയില് ലഭിച്ചത്. ഇവരെ ഇനി വിശദമായി ചോദ്യം ചെയ്യും. സംഭവത്തിന് പിന്നിലെ ഗൂഢാലോചന, മറ്റാരുടെയെങ്കിലും നിര്ദ്ദേശപ്രകാരമാണോ പ്രതികള് കൃത്യം നടത്തിയത് തുടങ്ങിയ കാര്യങ്ങളാണ് പോലീസിന് അറിയേണ്ടത്. ജനുവരി ഒന്നിന് 4 പ്രതികളെയും തിരികെ കോടതിയില് ഹാജരാക്കണം. 3 ദിവസം കൊണ്ട് ചോദ്യം ചെയ്യലും തെളിവെടുപ്പും പൂര്ത്തിയാക്കുകയാണ് ലക്ഷ്യം.
