കണ്ണൂര്: കൊല്ലപ്പെട്ട ടി.പി ചന്ദ്രശേഖരന്റെ ചിത്രം സോഷ്യല് മീഡിയയില് പങ്കുവെച്ച് ഭാര്യ കെ.കെ രമ. ടി.പി ചന്ദ്രശേഖരന് വധക്കേസില് ജീവപര്യന്തം ശിക്ഷിക്കപ്പെട്ട് ജയില് ശിക്ഷ അനുഭവിച്ച് വരികയായിരുന്ന സിപിഎം നേതാവ് പി.കെ കുഞ്ഞനന്തന്റെ മരണവാര്ത്ത വന്നതിന് പിന്നാലെയാണ് കെ.കെ രമ ഫെയ്സ്ബുക്കില് ചന്ദ്രശേഖരന് ഭക്ഷണം വിളമ്പുന്ന ചിത്രം പങ്കുവെച്ചത്. ‘എന്റെ സഖാവെ’ എന്ന അടിക്കുറിപ്പോടെ പങ്കുവെച്ച ചിത്രം സമൂഹമാധ്യമങ്ങളില് ഇപ്പോള് ചര്ച്ചയാകുന്നത്.
ടി.പി ചന്ദ്രശേഖരന് വധക്കേസില് 13-ാം പ്രതിയായിരുന്ന കുഞ്ഞനന്തന് അസുഖത്തെത്തുടര്ന്ന് കഴിഞ്ഞവര്ഷം ജനവരി 14 മുതല് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയിലായിരുന്നു. വയറ്റിലെ അണുബാധ മൂര്ച്ഛിച്ചതിനെത്തുടര്ന്ന് ഞായറാഴ്ച രാവിലെ ഐ.സി.യുവിലേക്ക് മാറ്റി. വ്യാഴാഴ്ച രാത്രിയോടെയാണ് മരണം സംഭവിച്ചത്.
