കണ്ണൂര് : കെ.എം.ഷാജി എംഎല്എയ്ക്ക് വീണ്ടും കുരുക്ക്. വീട്ടില് നിന്ന് വിജിലന്സ് 50 ലക്ഷം രൂപ കണ്ടെത്തി. കണ്ണൂരിലെ വീട്ടില് വിജിലന്സ് നടത്തിയ പരിശോധനയിലാണ് പണം കണ്ടെത്തിയത്. അനധികൃത സ്വത്ത് സമ്പാദനക്കേസുമായി ബന്ധപ്പെട്ട് ഷാജിയുടെ കോഴിക്കോട്ടെയും കണ്ണൂര് മണലിലെയും വീടുകളില് വിജിലന്സ് റെയ്ഡ് നടത്തിയിരുന്നു. കോഴിക്കോട് വിജിലന്സ് യൂണിറ്റാണ് കണ്ണൂരില് റെയ്ഡ് നടത്തിയത്.
കണ്ണൂര് ചാലോടിലും ഇതേ സമയം വിജിലന്സിന്റെ മറ്റൊരു സംഘം പരിശോധന ആരംഭിച്ചു. പ്രധാനമായും കെ. എം ഷാജിയുടെ സാമ്പത്തിക ഇടപാടുകളെപ്പറ്റി കൂടുതല് വിവരങ്ങള് തേടുകയാണ് ലക്ഷ്യം. 2012 മുതല് 2021 വരെയുള്ള 9 വര്ഷ കാലഘട്ടത്തില് കെഎം ഷാജിക്ക് 166 ശതമാനം അധിക വരുമാനം ഉണ്ടായെന്നാണ് വിജിലന്സിന്റെ കണ്ടെത്തല്.
കോഴിക്കോടുള്ള ഷാജിയുടെ വീട് നേരത്തെയും വിവാദത്തിലായിരുന്നു. കോര്പ്പറേഷന് നല്കിയ പ്ലാനിന് അപ്പുറത്തേക്ക് നിര്മ്മാണം നടത്തിയെന്ന് പരാതി ഉയര്ന്നിരുന്നു. ഭാര്യയുടെ പേരിലുള്ള ഈ വീടുമായി ബന്ധപ്പെട്ട് പിഴയടയ്ക്കാന് ഷാജിക്ക് കോര്പ്പറേഷന് നിര്ദ്ദേശം നല്കിയിരുന്നു. കെ.എം ഷാജി സമര്പ്പിച്ച സത്യവാങ്മൂലവും ഷാജിയുടെതായി കണ്ടെത്തിയ സ്വത്ത് വിവരങ്ങളും തമ്മില് 165 ശതമാനത്തിലധികം വ്യത്യാസം ഉണ്ട് എന്ന് കണ്ടെത്തിയിരുന്നു.
കഴിഞ്ഞ നവംബറില് ഷാജിക്കെതിരെ വിജിലന്സ് പ്രാഥമിക അന്വേഷണം ആരംഭിച്ചിരുന്നു. കെ.എം. ഷാജി അനധികൃത സ്വത്ത് സമ്പാദിച്ചുവെന്ന പരാതിയില് കേസെടുക്കാന് വിജിലന്സ് അന്വേഷണ ഉദ്യോഗസ്ഥന് സ്വന്തം നിലക്ക് തന്നെ അധികാരമുണ്ടെന്ന് നേരത്തെ കോടതി വ്യക്തമാക്കിയതാണ്. ഇതിനായി എഫ്.ഐ.ആര് രജിസ്റ്റര് ചെയ്യാന് കോടതിയുടെ പ്രത്യേക അനുമതി വേണ്ടെന്നും കോഴിക്കോട് വിജിലന്സ് പ്രത്യേക കോടതി ജഡ്ജി ടി. മധുസൂദനന് ഷാജിക്കെതിരെ എഫ്.ഐ.ആര് രജിസ്റ്റര് ചെയ്യാന് നിര്ദ്ദേശം നല്കണമെന്ന ഹര്ജി പരിഗണിക്കവേ പരാമര്ശിച്ചിരുന്നു.
പരാതിക്കാരനായ അഡ്വ. എം.ആര്. ഹരീഷ് നല്കിയ ഹര്ജിയില് കോടതി നിര്ദ്ദേശ പ്രകാരം വിജിലന്സ് പ്രത്യേക യൂണിറ്റ് നടത്തിയ പ്രാഥമികാന്വേഷണത്തില് വരവില് കവിഞ്ഞ സ്വത്ത് സമ്പാദിച്ചെന്ന് കണ്ടെത്തിയെന്നായിരുന്നു കോടതിയില് സമര്പ്പിച്ച റിപ്പോര്ട്ട്. കേസെടുക്കാന് പ്രഥമദൃഷ്ട്യാ തെളിവുണ്ടെന്നും അനധികൃത സ്വത്ത് സമ്പാദനത്തെപ്പറ്റി വിശദ അന്വേഷണം വേണമെന്നും റിപ്പോര്ട്ടില് ശുപാര്ശയുണ്ടായിരുന്നു.
