തൃശ്ശൂര്‍ : കൊടകര കുഴല്‍പ്പണക്കേസില്‍ മുഖ്യപ്രതിയായ മാര്‍ട്ടിന്‍ കവര്‍ച്ചാപണം ഉപയോഗിച്ച്‌ വാങ്ങിയ സ്വര്‍ണം അന്വേഷണ ഉദ്യോഗസ്ഥര്‍ക്ക് മുന്നില്‍ ഹാജരാക്കി. അഞ്ചുലക്ഷം രൂപയോളം വിലമതിക്കുന്ന 13.7 പവന്‍ സ്വര്‍ണമാണ് പ്രതിയുടെ അമ്മ സംഘത്തിനു മുന്നില്‍ ഹാജരാക്കിയത്.
പ്രതികളില്‍ ഒരാള്‍ക്ക് 10 ലക്ഷം മുതല്‍ 25 ലക്ഷം വരെ പ്രതിഫലം ലഭിച്ചുവെന്ന് പോലിസിന് നേരത്തെ വിവരം ലഭിച്ചിരുന്നു. കൂടാതെ പ്രതികള്‍ കാറും സ്വര്‍ണവും ഉള്‍പ്പെടെയുള്ള ആഢംബര ജീവിതം നയിച്ചതിന്റെയും തെളിവുകള്‍ പോലിസിന് ലഭിച്ചിരുന്നു. ഇവ കണ്ടെത്തുന്നതിന്റെ ഭാഗമായാണ് പ്രതി മാര്‍ട്ടിന്റെ അമ്മ അന്വേഷണ ഉദ്യോഗസ്ഥര്‍ക്ക് മുന്നില്‍ സ്വര്‍ണം ഹാജരാക്കിയത്.
കേസുമായി ബന്ധപ്പെട്ട് ബിജെപി സ്റ്റേറ്റ് ഓഫീസ് സെക്രട്ടറി ജി ഗിരീഷിനെ നാളെ ചോദ്യം ചെയ്യും. രാവിലെ 10ന് തൃശൂര്‍ പോലീസ് ക്ലബ്ബില്‍ എത്താന്‍ ഗിരീഷിന് അന്വേഷണ സംഘം നിര്‍ദേശം നല്‍കിയിട്ടുണ്ട്. കേസില്‍ ഇതുവരെ ചോദ്യം ചെയ്ത ബിജെപി നേതാക്കളുടെ മൊഴികളും അന്വേഷണ സംഘം വിശദമായി പരിശോധിക്കും. ഇവരില്‍ ചിലരെ വീണ്ടും ചോദ്യം ചെയ്യാന്‍ വിളിപ്പിച്ചേക്കും.
