കോന്നി : പുനലൂര് – മൂവാറ്റുപുഴ സംസ്ഥാന പാതയിലെ പ്രധാന നഗരമായ കോന്നി ജംഗ്ഷനില് സിഗ്നല് ലൈറ്റുകള് സ്ഥാപിക്കാത്തത് അപകടങ്ങള്ക്ക് കാരണമാകുന്നു. പുനലൂര് – മൂവാറ്റുപുഴ സംസ്ഥാന പാതയും പോസ്റ്റ് ഓഫീസ് റോഡും പൂങ്കാവ് – ചന്ദനപ്പള്ളി റോഡും ഒന്നിച്ചു ചേരുന്ന സംഗമ സ്ഥാനമാണ് കോന്നി സെന്ട്രല് ജംഗ്ഷന്. ഇതിനാല് തന്നെ നാല് ഭാഗത്ത് നിന്നും വരുന്ന വാഹനങ്ങള് കോന്നി സെന്ട്രല് ജംഗ്ഷനില് എത്തിയതിന് ശേഷമാണ് പല റോഡുകളിലേക്ക് തിരിയുന്നത്. സംസ്ഥാന പാതയുടെ നിര്മ്മാണ പ്രവര്ത്തനങ്ങള് പൂര്ത്തിയായിട്ടും കോന്നി സെന്ട്രല് ജംഗ്ഷനില് മാത്രം ട്രാഫിക് സിഗ്നല് ലൈറ്റുകള് ഇതുവരെ സ്ഥാപിച്ചിട്ടില്ല.
ബുധനാഴ്ച മാത്രം രണ്ട് വാഹനാപകടങ്ങള് കോന്നിയില് നടന്നു. തമിഴ്നാട്, ആന്ധ്രാ പ്രദേശ് പോലെയുള്ള ഇതര സംസ്ഥാനങ്ങളില് നിന്നുള്ള അയ്യപ്പ ഭക്തര് സഞ്ചരിക്കുന്ന സംസ്ഥാന പാതയിലെ കോന്നി സെന്ട്രല് ജംഗ്ഷനില് ഹോം ഗാര്ഡുകള് ആണ് ഗതാഗതം നിയന്ത്രിക്കുന്നത്. കൃത്യമായ സംവിധാനങ്ങള് ഇല്ലാത്തതിനാല് നിരവധി വാഹനാപകടങ്ങളും കോന്നിയില് നടക്കുന്നു. രാവിലെയും വൈകുന്നേരങ്ങളിലും മണിക്കൂറുകള് നീളുന്ന ഗതാഗത കുരുക്കാണ് കോന്നിയില് അനുഭവപ്പെടുന്നത്.
ഗുരുതരാവസ്ഥയില് രോഗികളുമായി പോകുന്ന ആംബുലന്സുകള് പോലും ഈ കുരുക്കില് അകപ്പെടാറുണ്ട്. സംസ്ഥാന പാതയുടെ നിര്മ്മാണം പൂര്ത്തിയായ ശേഷം നിരവധി വാഹനാപകടങ്ങള് കോന്നിയില് നടന്നിട്ടുണ്ട്. കോന്നി ഗ്രാമ പഞ്ചായത്ത്, ഗതാഗത ഉപദേശക സമിതി യോഗങ്ങള് ചേരുകയും നഗരത്തിലെ തിരക്ക് കുറയ്ക്കുവാന് വര്ഷങ്ങളായി പദ്ധതികള് തയ്യാറാക്കുകയും ചെയ്യുന്നുണ്ട്. എന്നാല് ഇവയെല്ലാം കടലാസില് മാത്രമായി ഒതുങ്ങി പോകുകയാണ്.
