കോന്നി : ഒന്നരമാസത്തോളമായി കോന്നി മേഖലയില് ജലവിതരണം മുടങ്ങിയതിനെതിരെ ജനപ്രതിനിധികളുടെ നേതൃത്വത്തില് കോന്നി വാട്ടര് അഥോറിറ്റി ഓഫീസിന് മുന്നില് സമരം തുടരുന്നു. രണ്ട് പ്രളയത്തിന് ശേഷവും കോന്നി വാട്ടര് അഥോറിറ്റി ഓഫീസിന് കീഴിലുള്ള പമ്പ് ഹൗസുകളില് നിന്നും ജലവിതരണം തുടങ്ങിയില്ല. അരുവാപ്പുലം ഗ്രാമപഞ്ചായത്തിലെ കൊട്ടാരത്തില് കടവ് പമ്പ് ഹൗസില് നിന്നുമാണ് ഈ മേഖലയിലേക്ക് ശുദ്ധജലം പമ്പ് ചെയ്യേണ്ടത്. ഈ പമ്പ് ഹൗസിലെ മോട്ടോറില് ചെളി നിറഞ്ഞിരിക്കുന്നതിനാല് ജലവിതരണം പൂര്ണ്ണമായി മുടങ്ങിയ അവസ്ഥയാണുള്ളത്.
ഇവിടെ അറ്റകുറ്റപ്പണികള് നടത്തുന്നതിനോ പകരം മോട്ടോര് സ്ഥാപിക്കുന്നതിനോ അധികൃതര് തയ്യാറായിട്ടില്ല. മോട്ടോര് തകരാര് പരിഹരിക്കുവാന് ജലവിഭവ വകുപ്പിന് ഫണ്ടില്ലെന്നാണ് അധികൃതര് പറയുന്നത്. കോന്നി ഗ്രാമപഞ്ചായത്ത് പ്രസിഡന്റ് സുലേഖ വി നായരുടെ നേതൃത്വവത്തിലാണ് സമരം. മോട്ടോറിലെ ചെളി നീക്കം ചെയ്താലെ പൈപ്പില് വെള്ളമെത്തു. ഇതിന് അധികൃതര് തയ്യാറാകണമെന്ന് ജനപ്രതിനിധികള് ആവശ്യപ്പെട്ടു. തുടര്ന്ന് ജലവിതരണം പുനഃസ്ഥാപിക്കുമെന്ന ഉറപ്പിന്മേല് ആറേ മുക്കാലോടെ സമരം അവസാനിച്ചു. ഇതിനിടയില് വാട്ടര് അഥോറിറ്റി ജീവനക്കാരെ തടഞ്ഞുവെച്ചു എന്ന പരാതിയില് കോന്നി പോലീസ് സ്ഥലത്തെത്തി. ഇത് പോലീസും ജനപ്രതിനിധികളും തമ്മില് വാക്ക് തര്ക്കത്തിന് കാരണമായി.
