കോന്നി: കോന്നി കരിയാട്ടത്തിൻ്റെ ഭാഗമായി ഗവ. മെഡിക്കൽ കോളേജിൻ്റെ നേതൃത്വത്തിൽ മെഡിക്കൽ ക്യാമ്പ് നടത്തി. മഴക്കാല രോഗങ്ങൾ വ്യാപകമായ സമയത്ത് നടന്ന ക്യാമ്പ് രോഗികൾക്ക് ആശ്വാസമായി. കെ.എസ്.ആർ.ടി.സി മൈതാനിയിലാണ് ക്യാമ്പ് നടന്നത്. സ്പെഷ്യാലിറ്റി വിഭാഗങ്ങളിലുള്ള ഡോക്ടർമാരുൾപ്പടെ 11 ഡോക്ടർമാർ ക്യാമ്പിൽ പങ്കെടുത്തു. 484 പേർ ചികിത്സ തേടിയെത്തി.
തികച്ചും സൗജന്യമായി നടത്തിയ ക്യാമ്പിൽ പങ്കെടുത്തവരിൽ നിന്നും കൂടുതൽ ചികിത്സ ആവശ്യമുള്ളവർക്ക് മെഡിക്കൽ കോളേജിൽ അതിനുള്ള സൗകര്യം ഒരുക്കും. അവർക്കാവശ്യമുള്ള പരിശോധനകളും നടത്തും. മെഡിക്കൽ കോളേജിൻ്റെ സഹകരണത്തോടെ കൂടുതൽ മെഡിക്കൽ ക്യാമ്പുകൾ മണ്ഡലത്തിൻ്റെ വിവിധ ഭാഗങ്ങളിൽ സംഘടിപ്പിക്കുമെന്ന് അഡ്വ. കെ.യു.ജനീഷ് കുമാർ എം.എൽ.എ പറഞ്ഞു. ക്യാമ്പുകളിൽ എത്തുന്ന അർഹതപ്പെട്ടവർക്ക് പൂർണ്ണമായും സൗജന്യ ചികിത്സ ഉറപ്പാക്കുമെന്നും എം.എൽ.എ പറഞ്ഞു.
