കോന്നി : കോന്നി താലൂക്ക് ആശുപത്രിയിൽ പേര് ദോഷം ഇല്ലാതെ പ്രവർത്തിക്കുന്നത് ഡന്റൽ, പീഡിയാട്രിക്, ജീവിത ശൈലീ രോഗ ക്ലിനിക്കുകൾ ആണ്. ഈ ഓ പി കളിൽ എല്ലാം രോഗികൾക്കും കൃത്യമായി തന്നെ സേവനം ലഭിക്കുന്നു. ജില്ലയിലെ തന്നെ മികച്ച നിലവാരത്തിൽ പ്രവർത്തിക്കുന്ന ഡന്റൽ ഓ പി കോന്നിയിലെതാണ്. ഇവിടെ ആവശ്യത്തിനുള്ള സജീകരണങ്ങൾ ഒരുക്കിയിട്ടുണ്ട്. ഇതുപോലെ പീഡിയാട്രിക് ഡോക്ടർമാരുടെ സേവനവും കൃത്യമായി രോഗികൾക്ക് ലഭിക്കുന്നത് കൊണ്ട് കാര്യമായ പരാതി ഉയരുന്നില്ല. എന്നാൽ ഏറ്റവും കൂടുതൽ രോഗികൾ എത്തുന്നത് ജീവിത ശൈലീ ക്ലിനിക്കിൽ ആണ്. ഇവിടെ ആവശ്യമായ സൗകര്യങ്ങളും ഫിസിഷൻ ഉൾപ്പെടെയുള്ളവരുടെ സേവനവും ലഭ്യമാണ്. എന്നാൽ ജീവിത ശൈലീ രോഗങ്ങളുമായി ബന്ധപെട്ട് മുൻകാലങ്ങളെ അപേക്ഷിച്ചു മരുന്നുകളുടെ ലഭ്യത കുറവ് മൂലം ഷുഗർ, പ്രെഷർ, കൊളസ്ട്രോൾ ഉൾപ്പെടെ ഉള്ള രോഗങ്ങൾക്ക് കൊടുക്കുന്ന മരുന്നുകളുടെ എണ്ണത്തിൽ കുറവ് വരുത്തിയിട്ടുണ്ട്.
മുൻ കാലങ്ങളിൽ 30 ദിവസത്തെ മരുന്നാണ് നൽകിയിരുന്നത് എങ്കിൽ ഇപ്പോൾ 15 ദിവസമാക്കി ചുരുക്കി. കൂടാതെ മറ്റുള്ള രോഗങ്ങൾക്ക് നൽകുന്ന ചില മരുന്നുകൾ താലൂക്ക് ആശുപത്രിയുടെ ഫാർമസിയിൽ നിന്നും ലഭിക്കില്ല. അത് പുറത്ത് ഉള്ള മെഡിക്കൽ സ്റ്റോറിൽ നിന്നും രോഗികൾ വില കൊടുത്ത് വാങ്ങേണ്ടി വരുന്നുണ്ട്. ഇതിനെല്ലാം പുറമെ അത്യാഹിത വിഭാഗത്തിൽ വൈകുന്നേരങ്ങളിൽ എത്തുന്ന രോഗികൾ നേരിടുന്ന പ്രധാന വിഷയം 108ആംബുലൻസിന്റെ സേവനം ലഭിക്കാത്തത് ആണ്.
ഇവിടെ ലഭിച്ചിരിക്കുന്ന 108 ആംബുലൻസ് സേവനം രാവിലെ 8മുതൽ 6 മണി വരെയാണ് ലഭിക്കുന്നത്. ഇതിനു ശേഷം ഉണ്ടാകുന്ന അപകടങ്ങളിൽ പെടുന്ന രോഗികളെ പത്തനംതിട്ടയിലോ കോട്ടയത്തോ എത്തിക്കണമെങ്കിൽ സ്വകാര്യ ആംബുലൻസുകളെ സമീപിക്കേണ്ട അവസ്ഥയാണ്. കോന്നി താലൂക് ആശുപത്രിയിലെ ആംബുലൻസ് സേവനം 24 മണിക്കൂർ ആകണമെന്ന് ആവശ്യപ്പെട്ടിട്ട് അനുകൂലമായ തീരുമാനം എടുക്കാൻ ആരോഗ്യ വകുപ്പ് തയ്യാറാകുന്നില്ല.
