കോട്ടാങ്ങല് : ഭദ്രകാളി ക്ഷേത്രത്തിലെ പടയണി ഉത്സവത്തില് ദേവിക്കു മുന്പില് ഇന്ന് കുളത്തൂര് കരക്കാരുടെ വലിയ പടയണി. രാത്രി 8ന് തിരുമുന്പില് വേല നടക്കും. ആഭരണ വിഭൂഷിതരായി, വാളും പരിചയുമേന്തി തപ്പ്, ചെണ്ട, കൈ മണി എന്നീ വാദ്യങ്ങളുടെ അകമ്പടിയോടെ കുട്ടികളുടെ വേലകളി ദേവിയ്ക്ക് ഏറ്റവും ഇഷ്ടപ്പെട്ട ചടങ്ങാണെന്ന് കരക്കാര് വിശ്വാസം. കരയുടെ വിവിധ പ്രദേശങ്ങളില് നിന്നുള്ള കുരുന്നുകള് തദ്ദേശീയരായ ആശാന്മാരുടെ കീഴില് അഭ്യസിച്ചാണ് തിരുമുന്പില് വേലക്കളിക്കുന്നത്.
തുടര്ന്ന് തിരുമുന്പില് പറവഴിപാട് നടക്കുന്നു. രാത്രി പന്ത്രണ്ടര മണിയോടെ വലിയപടയണി ചടങ്ങുകള് ആരംഭിക്കും. ദേവിയുടെ രൂപം അനുസ്മരിപ്പിച്ചു കളത്തില് എത്തുന്ന ഭൈരവി കോലങ്ങള് ജനങ്ങളില് ഭക്തിയുടെ നവ്യാനുഭവം സൃഷ്ടിക്കുന്നു. തുടര്ന്ന് യക്ഷി, അരക്കിയക്ഷി, പക്ഷി, മറുത, കൂട്ട മറുത, കാലന് എന്നീ കോലങ്ങള് വിനോദങ്ങള് എന്നിവ കളത്തില് എത്തും. മഹാ മൃത്യുഞ്ജയഹോമത്തിനു തുല്യമായ കാലന് കോലം പുലര്ച്ചെ നാലു മണിയോടെ കളത്തില് എത്തുന്നതോടെ കുളത്തൂര് കരയുടെ വലിയ പടയണി ചടങ്ങുകള്ക്ക് പര്യവസാനം കുറിക്കും.
