മല്ലപ്പള്ളി : ആലപ്രക്കാട് – കോട്ടാങ്ങൽ പൊതുമരാമത്ത് വക റോഡിലെ പാലത്തിന്റെ അപകടാവസ്ഥയിലായ കൈവരികൾ പുനർ നിർമ്മിക്കണമെന്ന ആവശ്യം ശക്തമാകുന്നു. പൊന്തൻപുഴ റോഡിൽ നിന്നും പ്രവേശിക്കുന്ന ഭാഗത്തെ പാലത്തിന്റെ കൈവരികൾ ദ്രവിച്ച് ഏതു നിമിഷവും നിലം പതിക്കാവുന്ന അവസ്ഥയിലായിട്ട് വർഷങ്ങൾ കഴിഞ്ഞിട്ടും കൈവരി സ്ഥാപിക്കാൻ നടപടി ഉണ്ടാകുന്നില്ലെന്നാണ് നാട്ടുകാരുടെ പരാതി. പാലത്തിന്റെ ഇരുവശങ്ങളിലെയും കൈവരികളിലെ കോൺക്രീറ്റ് ഇളകി കമ്പികൾ ദ്രവിച്ച് പോയ നിലയിലാണ്.
വിദ്യാർഥികളും യാത്രക്കാരും മറ്റും ബസ് കാത്ത് നിൽക്കുന്നത് ഈ പാലത്തിന്റെ സമീപമാണ്. കുട്ടികൾ അറിയാതെ പാലത്തിന്റെ കൈവരിയിൽ തൊട്ടാൽ കൈവരി തകർന്ന് തോട്ടിൽ വീഴും. കുത്തനെയുള്ള ഇറക്കമായതിനാൽ കൈവരിയില്ലാത്തതും അപകട സാധ്യത വർദ്ധിപ്പിക്കുന്നു. പാലത്തിലെ അപകടാവസ്ഥയിലായ കൈവരികൾ പുനർ നിർമ്മിക്കണമെന്ന നാട്ടുകാരുടെ ആവശ്യം ശക്തമായിരിക്കുകയാണ്.
