വൈത്തിരി : വയനാട് ചുരത്തില് കെ.എസ്.ആര്.ടി.സി ബസ് നിയന്ത്രണം വിട്ടു. തുടര്ന്ന് ബസ് സുരക്ഷാഭിത്തിയിലുരസി നിന്നു. എന്നാല്, ബസ് മറിഞ്ഞേക്കുമെന്ന പേടിയില് ധൃതിയില് ഇറങ്ങിയ യാത്രക്കാരില് ഒരാള് കൊക്കയില് വീണ് പരിക്കേറ്റു. ആലുവ സ്വദേശിയും പൂക്കോട് വെറ്ററിനറി സര്വകലാശാല ജീവനക്കാരനുമായ ഷാജിക്കാണ് (50) പരിക്കേറ്റത്. ബുധനാഴ്ച രാവിലെ ആറരക്ക് എട്ടാം വളവിനു സമീപം ആണ് സംഭവം. കോഴിക്കോടു നിന്ന് സുല്ത്താന് ബത്തേരിയിലേക്ക് പോവുകയായിരുന്ന ബസാണ് അപകടത്തില്പെട്ടത്.
ഇരുട്ടില് ബഹളം കേട്ടുണര്ന്ന യാത്രക്കാര് പുറത്തേക്കു കടക്കാന് തുടങ്ങി. ഷാജിയും ഏതാനും യാത്രക്കാരും മുന്വാതിലിലൂടെയായിരുന്നു ഇറങ്ങിയത്. ഇവിടെ ഭിത്തി പൊളിഞ്ഞ ഭാഗത്തേക്ക് കാല് വെച്ചതും ഷാജി താഴ്ചയിലേക്ക് പതിക്കുകയായിരുന്നു. വീഴ്ചയുടെ ആഘാതത്തില് കൈക്കും കാലിനും പരിക്കേറ്റ ഷാജി വൈത്തിരി ടൗണിലിറങ്ങിയ ശേഷം സുഹൃത്തിന്റെ കൂടെ താലൂക്കാശുപത്രിയില് ചികിത്സ തേടി. കോഴിക്കോട് ഡിപ്പോയില് നിന്നുള്ള ബസാണ് അപകടത്തില്പെട്ടത്.
