കൊച്ചി : ഷെയര് ട്രേഡിങ്ങിന്റെ പേരില് തൃപ്പൂണിത്തുറ സ്വദേശിയില് നിന്നും ഒരു കോടിയിലധികം രൂപ തട്ടിയെടുത്ത കേസില് രണ്ട് പേര് കൊച്ചിയില് പിടിയിലായി. തൊടുപുഴ വണ്ണപ്പുറം സ്വദേശി യാസിന്, കൂട്ടാളി ആദില് എന്നിവരാണ് പിടിയിലായത്. മൂന്ന് മാസത്തിനിടെ യാസിന്റെ അക്കൗണ്ടിലേക്ക് മൂന്ന് കോടിയിലധികം രൂപ എത്തിയതായും കണ്ടെത്തി. സൈബര് പോലീസിന്റെ സഹായത്തോടെ തൃപ്പൂണിത്തുറ ഹില് പാലസ് പോലീസ് നടത്തിയ അന്വേഷണത്തിലാണ് യാസിനും ഇയാളുടെ കൂട്ടാളിയായ ആദിലും വലയിലായത്. തട്ടിയെടുത്ത പണം ചില ബാങ്ക് അക്കൗണ്ടിലേക്ക് എത്തിയതായി പോലീസിന് വിവരം ലഭിച്ചിരുന്നു. തുടര്ന്ന് ഈ അക്കൗണ്ടുകള് കേന്ദ്രീകരിച്ച് നടത്തിയ അന്വേഷണമാണ് യാസിന്, ആദില് എന്നിവരിലേക്ക് എത്തിയത്.
ഇരുവരെയും കസ്റ്റഡിയിലെടുത്ത് ചോദ്യം ചെയ്ത ശേഷം ബാങ്ക് അക്കൗണ്ട് പരിശോധിച്ചപ്പോഴാണ് ഇതില് ഒരാളുടെ അക്കൗണ്ടിലേക്ക് മാത്രം മൂന്ന് കോടി രൂപയോളം എത്തിയിട്ടുണ്ടെന്ന് വ്യക്തമായത്. തട്ടിപ്പ് സംഘങ്ങള്ക്ക് വാടകയ്ക്ക് നല്കിയ മ്യൂള് അക്കൗണ്ടുകളാണ് ഇതെന്നാണ് പോലീസിന്റെ പ്രാഥമിക നിഗമനം. ഇരുവര്ക്കും തട്ടിപ്പ് സംഘത്തിലെ പ്രധാന പ്രതികളുമായി ബന്ധമുണ്ടോ എന്നും പോലീസ് അന്വേഷിച്ചുവരുന്നുണ്ട്. ഹില്പാലസ് പോലീസിന്റെ നേതൃത്വത്തില് പ്രതികളെ വിശദമായി ചോദ്യം ചെയ്തു വരികയാണ്.
