കോന്നി : അടവി കുട്ടവഞ്ചി സവാരി കേന്ദ്രത്തിലെ വള്ളം കയറുന്ന കടവില് മണല് നിറഞ്ഞത് കുട്ടവഞ്ചി സവാരിക്ക് തടസമാകുന്നു. കടവില് കെട്ടിയിട്ടിരിക്കുന്ന വലിയ മുളംചെങ്ങാടത്തില് കയറിയതിന് ശേഷമാണ് സഞ്ചാരികള് കുട്ടവഞ്ചിയിലേക്ക് കയറുന്നത്. എന്നാല് ഇവിടെ മണല് നിറഞ്ഞതിന് ശേഷം ചെങ്ങാടം ഉണ്ടായിരുന്ന ഭാഗത്തെ വെള്ളം വറ്റുകയും ചെങ്ങാടം മണലില് പുതയുകയും ചെയ്തു. ഇപ്പോള് എത്തുന്ന സഞ്ചാരികള് ചെങ്ങാടത്തില് കയറാതെയാണ് വഞ്ചിയിലേക്ക് കയറുന്നത്. വള്ളം കയറുന്ന ഭാഗം ഒരിടത്ത് കുഴിയായതും അപകട ഭീഷണി ഉയര്ത്തുന്നുണ്ട്.
മാത്രമല്ല യാത്ര കഴിഞ്ഞ് വരുന്ന വഞ്ചികള് ഇപ്പോള് മണലിന് മുകളിലേക്ക് കയറ്റി ഇടുന്നതും പതിവാണ്. മണ്ണീറയില് നിന്ന് ഉത്ഭവിക്കുന്ന തോട് കല്ലാറ്റില് സംഗമിക്കുന്ന കേന്ദ്രത്തില് നിന്നാണ് കുട്ടവഞ്ചി സവാരി ആരംഭിക്കുന്നത്. ഇവിടെ നിന്നും കഴിഞ്ഞ മഴക്കാലത്ത് കുത്തിയൊഴുകി വന്ന മഴവെള്ളത്തില് അടിഞ്ഞതാണ് ഈ മണലുകള്. കല്ലാറ്റില് ജലനിരപ്പ് ഉയര്ന്നതിനെ തുടര്ന്ന് കുട്ടവഞ്ചി കയറുവാന് എത്തുന്നവരുടെ എണ്ണത്തിലും വര്ധനവുണ്ടായിട്ടുണ്ട്. കടവില് നിന്ന് മണല് നീക്കം ചെയ്താല് മാത്രമേ സുഗമമായ സവാരി നടപ്പിലാകൂ.
