കൊച്ചി : കോണ്ഗ്രസിന്റെ പ്രസക്തി തന്നെ നഷ്ടപ്പെട്ടിരിക്കുകയാണെന്ന് കെ വി തോമസ്. പ്രഗത്ഭരെല്ലാം വിട്ടുപോയി പാര്ട്ടി ശുഷ്ക്കമായെന്നും കോണ്ഗ്രസ് ഒരു അസ്തികൂടമായി മാറിയിരിക്കുന്നുവെന്നും അദ്ദേഹം മാധ്യമങ്ങളോട് പറഞ്ഞു. എന്റെ ചിന്താഗതി വ്യത്യസ്തമാണ്. ഞാന് വികസനത്തിനൊപ്പമാണ് നിന്നത്. ജനകീയ പ്രശ്നങ്ങള്ക്കൊപ്പമാണ് നിന്നത്. പാലാരിവട്ടം പാലം ഉമ്മന്ചാണ്ടിയുടെ കാലത്ത് തുടങ്ങി ഗതാഗതയോഗ്യമാക്കിയത് പിണറായിയാണ്. വൈറ്റിലയില് കല്ലിട്ടപ്പോള് ഉമ്മന്ചാണ്ടിക്കൊപ്പം ഞാനുണ്ടായിരുന്നു. ആ കല്ലിട്ടതല്ലാതെ വേറെ ഒന്നും ചെയ്യാന് പറ്റിയിട്ടില്ല. മേല്പ്പാലമുണ്ടാക്കി അത് പൂര്ത്തിയാക്കിയത് പിണറായിയുടെ കാലത്താണെന്നും കെ.വി തോമസ് കൂട്ടിച്ചേര്ത്തു.
ഇന്നലെ രാജസ്ഥാനിലെ ചിന്തന് ശിബിര് വേദിയിലായിരുന്നു കെ.പി.സി.സി അധ്യക്ഷന് കെ. സുധാകരന് കെ.വി തോമസിനെ പുറത്താക്കുന്ന വിവരം പ്രഖ്യാപിച്ചത്. തൃക്കാക്കര എല്.ഡി.എഫ് കണ്വന്ഷനില് കെ.വി തോമസ് പങ്കെടുത്ത് മണിക്കൂറുകള്ക്കകമായിരുന്നു നടപടി. ഉദയ്പൂരിലെ ചിന്തന് ശിബിര് വേദിക്ക് മുന്നില് നാടകീയമായിട്ടാണ് പുറത്താക്കല് പ്രഖ്യാപനം കെ. സുധാകരന് നടത്തിയത്.
