ലഖ്നോ : ഉത്തര്പ്രദേശ് ബുലന്ദേശ്വറില് രാത്രിയില് സ്ത്രീയെ ആക്രമിക്കുന്ന സി.സി.ടി.വി ദൃശ്യങ്ങള് പുറത്ത്. രണ്ടുപേര് സ്ത്രീയെ ഓടിക്കുന്നതും പിടികൂടി വലിച്ചു കൊണ്ടുപോകുന്നതുമാണ് ദൃശ്യങ്ങള്. വീഡിയോ വൈറലായതോടെ പോലീസ് സ്ത്രീയെ കണ്ടെത്തുകയും കേസ് രജിസ്റ്റര് ചെയ്യുകയും ചെയ്തു. ജഹാന്ഗിറബാദിലെ ഖലോര് സ്വദേശിയാണ് യുവതി. ആക്രമിച്ച മൂന്നുപേരുടെ പേരുകള് യുവതി വെളിപ്പെടുത്തുകയും ചെയ്തു.
ഖുര്ജ നഗറിലെ ബന്ധുവിന്റെ വീട്ടിലെത്തിയതായിരുന്നു യുവതി. അവിടെവെച്ച് ബന്ധു ഉപദ്രവിച്ചതിനെ തുടര്ന്ന് വീട്ടില്നിന്ന് ഇറങ്ങിയോടി. എന്നാല്, ബന്ധുവിന്റെ സുഹൃത്തുക്കളായ രണ്ടുപേര് തന്നെ പിടികൂടുകയും ഉപദ്രവിക്കുകയുമായിരുന്നു -യുവതിയുടെ പരാതിയില് പറയുന്നു. സി.സി.ടി.വി ദൃശ്യങ്ങളില് നവംബര് 24ന് രാത്രി 10.59നാണ് സംഭവം. ഇരുട്ടിലൂടെ സ്ത്രീ ഓടുന്നതും പ്രദേശത്തെ ഒരു വാതിലില് മുട്ടുന്നതും കാണാം. യുവതിയുടെ പിന്നാലെ രണ്ടുപേര് വരികയും യുവതിയെ വലിച്ചുകൊണ്ടുപോകുന്നതും വീഡിയോയിലുണ്ട്.
പ്രതികള് തന്നെ ഉപദ്രവിക്കുകയും ബുലന്ദേശ്വറിലെ സ്കൂളിന് സമീപം ഉപേക്ഷിക്കുകയായിരുന്നുവെന്നും യുവതിയുടെ പരാതിയില് പറയുന്നു. സംഭവം പുറത്തുപറഞ്ഞാല് വരും വരായ്കകള് അനുഭവിക്കേണ്ടി വരുമെന്ന് ഭീഷണിപ്പെടുത്തിയതായും പറയുന്നു. പീഡനം, ആക്രമണം, ഭീഷണിപ്പെടുത്തല് എന്നീ വകുപ്പുകള് പ്രകാരമാണ് കേസ്.