തിരുവനന്തപുരം : തിരുവനന്തപുരത്തെ ഫോര്ട്ട് ആശുപത്രിയിലെ വനിതാ ഡോക്ടര്ക്ക് നേരെ കൈയ്യേറ്റം. വ്യാഴാഴ്ച രാത്രി ഡ്യൂട്ടിയിലുണ്ടായിരുന്ന ഡോക്ടറെയാണ് രണ്ടംഗ സംഘം കൈയ്യേറ്റം ചെയ്തത്. അടിപിടി കേസില് ചികിത്സക്കെത്തിയ രണ്ടു പേരാണ് അക്രമികള്. വരി നില്ക്കാന് തയാറാകാതിരുന്ന ഇവര് ചികിത്സ വൈകിയെന്ന് ആരോപിച്ചായിരുന്നു കൈയ്യേറ്റം. ഡോക്ടറുടെ കൈ പിടിച്ചു തിരിക്കാന് അക്രമികള് ശ്രമിക്കുകയായിരുന്നു.
തടയാന് ശ്രമിച്ച സുരക്ഷാ ജീവനക്കാരനെയും സംഘം ആക്രമിച്ചു. തുടര്ന്ന് ഫോര്ട്ട് പോലീസ് എത്തി റഷീദ് എന്നയാളെ അറസ്റ്റ് ചെയ്തു. ഒളിവില് പോയ രണ്ടാമത്തെ ആള്ക്കായി തിരച്ചില് പുരോഗമിക്കുന്നു. കൈക്ക് പരിക്കേറ്റ ഡോക്ടര് ആശുപത്രിയില് തന്നെ ചികിത്സയിലാണ്. ഡോക്ടറുടെ മൊഴി രേഖപ്പെടുത്തിയ ശേഷം വിശദ അന്വേഷണം നടത്തുമെന്ന് പോലീസ് അറിയിച്ചു.
