സംഭാല്: ഭര്ത്താവിന് സ്നേഹം കൂടിപ്പോയതില് പരിഭവിച്ച് വിവാഹമോചനം ആവശ്യപ്പെട്ട് യുവതി കോടതിയില്. ഉത്തര്പ്രദേശിലെ സംഭാലിലാണ് സംഭവം. തെറ്റ് ചെയ്താല് പോലും ഭര്ത്താവ് തന്നോട് വഴക്കിടുന്നില്ലെന്നാണ് യുവതിയുടെ പരാതി. ഇവരുടെ വിവാഹം കഴിഞ്ഞിട്ട് 18 മാസമായതേയുള്ളു.
‘ അദ്ദേഹം എന്നോട് ദേഷ്യത്തില് സംസാരിക്കുന്നില്ല, എനിക്കായി ഭക്ഷണം പാകം ചെയ്യുകയും വീട്ടു ജോലികളില് സഹായിക്കുകയും ചെയ്യുന്നു. എനിക്ക് അദ്ദേഹത്തോട് വഴക്കിടണം. എല്ലാകാര്യങ്ങളിലും എന്നോട് യോജിക്കുന്ന ഭര്ത്താവുമായുള്ള ദാമ്പത്യം എനിക്കു വേണ്ട” -യുവതി പറഞ്ഞു.
താന് ഭാര്യയെ ഒരുപാട് സ്നേഹിക്കുന്നുണ്ടെന്നും അവള് എപ്പോഴും സന്തോഷവതിയായിരിക്കണമെന്നാണ് ആഗ്രഹിക്കുന്നതെന്നും യുവാവ് പറഞ്ഞു. അവളുടെ ആഗ്രഹം പോലെ വേഗം കേസ് അവസാനിപ്പിക്കണമെന്നും ഭര്ത്താവ് കോടതിയെ അറിയിച്ചു. അതേസമയം യുവതിയുടെ ഹര്ജി കോടതി തള്ളി.
