മൂവാറ്റുപുഴ : ഭൂമാഫിയ പായിപ്ര മേഖലയില് കുന്നിടിക്കലും മലയിടിക്കലും തുടരുന്നു. റവന്യൂ മന്ത്രി റിപ്പോര്ട്ട് തേടിയതടക്കമുള്ള മലകളാണ് വീണ്ടും ഇടിച്ചു നിരത്തുന്നത്. കഴിഞ്ഞ ദിവസം ചേര്ന്ന ജില്ല വികസന സമിതി യോഗത്തിലും മലയിടിക്കലിനെതിരെ ശക്തമായ നടപടി ഉണ്ടാകുമെന്ന് ജില്ല കലക്ടര് പറഞ്ഞു. എള്ളുമല, മയ്യുണ്ണി മല, എഴിമല തുടങ്ങി എല്ലാം ഇടിച്ചുനിരത്തുകയാണ്. റവന്യൂമന്ത്രിക്ക് നേരിട്ട് നല്കിയ പരാതിയെതുടര്ന്ന് പാരിസ്ഥിതിക പ്രശ്നങ്ങള് കണക്കിലെടുത്ത് മണ്ണെടുപ്പും നിര്ത്തിവെക്കാന് ഉത്തരവിട്ട് രണ്ടാഴ്ച കഴിയുംമുമ്പ് തന്നെ രാത്രിയും പകലും പരസ്യമായി മലയിടിക്കല് തുടരുകയാണ്.
മൈനിങ് ആന്ഡ് ജിയോളജി, റവന്യൂ, പോലീസ്, പഞ്ചായത്ത് വകുപ്പുകളുടെ മൗനാനുവാദത്തോടെയാണ് മലകള് ഇടിച്ചുനിരത്തുന്നത്. ഉദ്യോഗസ്ഥര് ഓഫീസില്നിന്ന് ഇറങ്ങുന്നതിനുമുമ്പ് മണ്ണെടുക്കുന്നവരുടെ ഫോണില് വിവരം എത്തിക്കുകയാണ്. ഇതോടെ പരിശോധകളും പ്രഹസനമാവുന്നു. കേന്ദ്രസര്ക്കാറിന്റെ കീഴിലുള്ള മൈക്രോ സ്റ്റേഷന് കെട്ടിടത്തിനും മണ്ണെടുപ്പ് ഭീഷണിയിലാണ്.
