ശബരിമല : തീര്ഥാടന കാലത്ത് നിലയ്ക്കലില് അന്നദാനത്തിന്റെ മറവില് ഒരു കോടിയിലധികം രൂപയുടെ തട്ടിപ്പ് നടന്നെന്ന കണ്ടെത്തലില് നിലയ്ക്കല് അഡ്മിനിസ്ട്രേറ്റീവ് ഓഫീസര് ജയപ്രകാശിനെ സസ്പെന്റ് ചെയ്തു. പലവ്യഞ്ജനവും പച്ചക്കറിയും വാങ്ങിയതിന്റെ പേരില് ഒരുകോടിയിലധികം രൂപ ദേവസ്വം ഉദ്യോഗസ്ഥര് തട്ടിച്ചെന്നാണ് കണ്ടെത്തല്. തീര്ത്ഥാടനകാലം കഴിഞ്ഞശേഷം 30,00,900 രൂപയുടെ ബില്ല് കമ്പനി ഉടമയായ ജയപ്രകാശ് ദേവസ്വം ബോര്ഡിന് നല്കി. എട്ടു ലക്ഷം ആദ്യം കരാറുകാരന് നല്കി. ബാക്കി തുക നല്കണമെങ്കില് ക്രമക്കേടിനെ കൂട്ട് നില്ക്കണമെന്ന് ഉദ്യോഗസ്ഥര് നിര്ബന്ധിച്ചതോടെയാണ് കരാറുകാരന് ദേവസ്വം വിജിലിന്സിനെ സമീപിച്ചത്.
തുടര്ന്ന് വിജിലന്സ് അന്വേഷണത്തില് കണ്ടെത്തിയത് വന് ക്രമക്കേടായിരുന്നു. 30 ലക്ഷം ചെലവാക്കിയ അന്നദാനത്തിന്റെ മറവില് ഏകദേശം ഒന്നരക്കോടിയുടെ ബില്ലാണ് ഉദ്യോഗസ്ഥര് മാറിയെടുത്തതെന്ന് വിജിലന്സ് കണ്ടെത്തി. ഉദ്യോഗസ്ഥരുമായി അടുപ്പമുള്ള മറ്റൊരു സ്ഥാപനത്തിന്റെ മറവില് അഴിമതിപ്പണം ബാങ്കില് നിന്നും മാറിയതായും കണ്ടെത്തി. ബാങ്കുവഴി ഈ തട്ടിപ്പ് കണ്ടെത്തിയതോടെ 11 ലക്ഷം രൂപ ജയപ്രകാശിന്റെ അക്കൗണ്ടിലേക്ക് മാറ്റികൊടുത്ത് പരാതി ഒത്തുതീര്ക്കാനും ശ്രമിച്ചു. വ്യാജരേഖകള് ചമച്ച് ലക്ഷങ്ങള് തട്ടാനുള്ള ശ്രമം ദേവസ്വം വിജിലന്സാണ് ആദ്യം കണ്ടത്തിയത്.
