കണ്ണൂര്: മഹിളാ കോണ്ഗ്രസ് നടത്തിയ കളക്ടറേറ്റ് മാര്ച്ചില് പ്രതിഷേധമിരമ്പി. സ്വര്ണക്കള്ളക്കടത്ത് കേസിലെ പ്രതികളെ സംരക്ഷിക്കുന്ന മുഖ്യമന്ത്രി പിണറായി വിജയന് അല്പ്പമെങ്കിലും നാണമുണ്ടെങ്കില് രാജിവെയ്ക്കണമെന്ന് മഹിളാ കോണ്ഗ്രസ് സംസ്ഥാന പ്രസിഡന്റ് ലതികാ സുഭാഷ് പറഞ്ഞു. സ്വര്ണക്കള്ളക്കടത്തിന് നേതൃത്വം നല്കിയ പിണറായി സര്ക്കാര് രാജിവെയ്ക്കണമെന്ന് ആവശ്യപ്പെട്ടും സിപിഎം നേതൃത്വത്തില് നടത്തുന്ന അക്രമത്തിലും പ്രതിഷേധിച്ച് മഹിളാ കോണ്ഗ്രസ് ജില്ലാ കമ്മിറ്റി നടത്തിയ കളക്ട്രേറ്റ് മാര്ച്ച് ഉദ്ഘാടനം ചെയ്യുകയായിരുന്നു അവര്.
കെ എസ് യുവിന്റെയും യൂത്ത് കോണ്ഗ്രസിന്റെയും പ്രവര്ത്തകരെ തല്ലി ചതച്ച പോലീസുകാര്ക്കെതിരെ കൊലക്കുറ്റത്തിന് കേസെടുക്കണം. ആഭ്യന്തരം കയ്യിലുണ്ടെന്ന് വിചാരിച്ച് എന്തും ചെയ്യാമെന്ന് മുഖ്യമന്ത്രി വിചാരിക്കരുത്. കോണ്ഗ്രസിനെ അടിച്ചൊതുക്കാമെന്നത് വ്യാമോഹം മാത്രമാണ്. ഘടകകക്ഷികളെ ഒപ്പം ചേര്ക്കുമ്പോള് അവരെക്കുറിച്ച് അന്ന് പറഞ്ഞ ആക്ഷേപം പിന്വലിക്കാന് സിപിഎം തയ്യാറാണോയെന്നും ലതിക സുഭാഷ് കുറ്റപ്പെടുത്തി. ജില്ലാ പ്രസിഡന്റ് രജനി രമാനന്ദ് അധ്യക്ഷനായി. സുമ ബാലകൃഷ്ണന്, ഡോ. ഫിലോമിന, സരസ്വതി, ഡിസിസി പ്രസിഡന്റ് സതീശന് പാച്ചേനി, സജീവന് മറോളി, വി എ നാരായണന്, എം പി മുരളി തുടങ്ങിയവര് പങ്കെടുത്തു.
