തിരുവനന്തപുരം : പതിനാറാം കേരള നിയമസഭയുടെ ഒന്നാം സമ്മേളനത്തില് എംഎല്എമാരുടെ സത്യപ്രതിജ്ഞ ചടങ്ങ് പൂര്ത്തിയായി. രാവിലെ ഒന്പത് മണിയോടെയാണ് പ്രോടെം സ്പീക്കര് ജി. സുധാകരന്റെ അധ്യക്ഷതയില് ചടങ്ങുകള് ആരംഭിച്ചത്. അക്ഷരമാല ക്രമത്തില് അംഗങ്ങള് സത്യവാചകം ചൊല്ലി ചുമതലയേറ്റു. പുതിയ സര്ക്കാരിന്റെയും ജനപ്രതിനിധികളുടെയും ഔദ്യോഗിക പ്രവര്ത്തനങ്ങള്ക്ക് തുടക്കം കുറിക്കുന്ന ചടങ്ങായതിനാല് സഭയില് ആവേശകരമായ അന്തരീക്ഷമാണ് ഉണ്ടായിരുന്നത്. വിവിധ പാര്ട്ടി നേതാക്കളും പ്രവര്ത്തകരും നിയമസഭാ സമുച്ചയത്തിലെത്തി ചടങ്ങുകള് നിരീക്ഷിച്ചു. നാളെയാണ് സ്പീക്കറും ഡെപ്യൂട്ടി സ്പീക്കറും തെരഞ്ഞെടുക്കപ്പെടുന്നത്. തുടര്ന്ന് ഗവര്ണറുടെ നയപ്രഖ്യാപന പ്രസംഗവും പുതിയ സര്ക്കാരിന്റെ ആദ്യ ബജറ്റും സഭയില് അവതരിപ്പിക്കാനിരിക്കുകയാണ്.
അതേസമയം സഭയില് ഏറ്റവും കൂടുതല് ശ്രദ്ധനേടിയത് ഇടത് വിമത നേതാക്കളുടെ സത്യപ്രതിജ്ഞയായിരുന്നു. പയ്യന്നൂര് എംഎല്എ വി. കുഞ്ഞികൃഷ്ണന് പിണറായി വിജയനെ അഭിവാദ്യം ചെയ്ത ശേഷമാണ് സത്യപ്രതിജ്ഞ നടത്തിയത്. തളിപ്പറമ്പ് എംഎല്എ ടി.കെ. ഗോവിന്ദന് പിണറായി വിജയനോട് ഹസ്തദാനം നല്കിയ ശേഷമാണ് സത്യവാചകം ചൊല്ലിയത്. മറുപടിയായി പിണറായി വിജയനും ഇരുവരെയും അഭിവാദ്യം ചെയ്തു. കമ്മ്യൂണിസ്റ്റ് ആശയങ്ങളില് ഉറച്ചുനില്ക്കുന്നതായും ജനങ്ങള് നല്കിയ ഉത്തരവാദിത്വം വികസന പ്രവര്ത്തനങ്ങളിലൂടെ മുന്നോട്ട് കൊണ്ടുപോകുമെന്നും വി. കുഞ്ഞികൃഷ്ണന് പ്രതികരിച്ചു. ഇതിനുപുറമെ പ്രോടെം സ്പീക്കര് ജി. സുധാകരന് വി.ഡി. സതീശനെ ബഹുമാന്യനായ മുഖ്യമന്ത്രിയെന്നും പിണറായി വിജയനെ ആദരണീയനായ പ്രതിപക്ഷ നേതാവെന്നും വിശേഷിപ്പിച്ചതും സഭയില് രാഷ്ട്രീയ ചര്ച്ചകള്ക്ക് വഴിവെച്ചു.
