തിരുവനന്തപുരം : മുട്ടില് മരം മുറിക്കേസ് അന്വേഷിച്ച ഡി.എഫ്.ഒ ധനേഷ്കുമാറിന് ഭീഷണി. മരം മുറിക്കേസ് അന്വേഷിച്ച പ്രത്യേക സംഘത്തിലെ അംഗമായിരുന്നു ഡി.എഫ്.ഒ ധനേഷ് കുമാര്. ധനേഷ് ഇക്കാര്യം ചൂണ്ടിക്കാട്ടി എ.ഡി.ജി.പി ശ്രീജിത്തിന് പരാതി നല്കി. ജയിലില് വനംവകുപ്പ് ഉദ്യോഗസ്ഥര് ചോദ്യം ചെയ്യുമ്പോഴും പ്രതികള് ഭീഷണി മുഴക്കിയെന്ന് ധനേഷ് പരാതിയില് ആരോപിക്കുന്നു.
കോഴിക്കോട് ഫ്ലയിംഗ് സ്ക്വാഡ് ഡി.എഫ്.ഒ ആയിരുന്നു പി. ധനേഷ് കുമാര്. മരം മുറി അന്വേഷിക്കുന്ന പ്രത്യേക സംഘത്തിലെ അഞ്ച് ഡി.എഫ്.ഒമാരില് ഒരാള് ധനേഷ്കുമാറായിരുന്നു. അന്വേഷണത്തിന്റെ ഭാഗമായി എറണാകുളം, തൃശൂര് ജില്ലകളുടെ ചുമതല ധനേഷ് വഹിച്ചിരുന്നു. കേരളത്തിലെ പല റേഞ്ചുകളിലെ വനഭൂമികളിലെ നിരവധി കൊള്ളകളും കൈയേറ്റങ്ങളും തടയുകയും വനം സംരക്ഷിക്കുകയും ചെയ്ത ഉദ്യോഗസ്ഥന് എന്ന നിലയില് ഡിപ്പാര്ട്ട്മെന്റില് അറിയപ്പെടുന്ന ഉദ്യോഗസ്ഥനാണ് ധനേഷ് കുമാര്.