കോന്നി : കോന്നിയിൽ തദ്ദേശ സ്വയം ഭരണ തിരഞ്ഞെടുപ്പുമായി ബന്ധപ്പെട്ട് പോളിംഗ് ഉദ്യോഗസ്ഥർക്ക് നൽകേണ്ട വോട്ടിങ് യന്ത്രം അടക്കമുള്ളവ നൽകുന്നതിൽ കാലതാമസം നേരിട്ടു. കഴിഞ്ഞ ദിവസം രാവിലെയാണ് കോന്നി അമൃത വൊക്കെഷണൽ ഹയർ സെക്കണ്ടറി സ്കൂളിൽ ക്രമീകരിച്ച പോളിംഗ് സാമഗ്രികളുടെ വിതരണ കേന്ദ്രത്തിൽ മെഷീനുകൾ ഉൾപ്പെടെയുള്ളവ പോളിംഗ് ഉദ്യോഗസ്ഥർക്ക് നൽകുവാൻ വൈകിയത്. രാവിലെ 9 മണിക്ക് തന്നെ പോളിംഗ് സാമഗ്രികൾ വിതരണം ചെയ്യും എന്ന് അറിയിച്ചിരുന്നതിനെ തുടർന്ന് ഉദ്യോഗസ്ഥർ നേരത്തെ തന്നെ എത്തിയിരുന്നു. എന്നാൽ 11 ആയിട്ടും സ്ട്രോങ്ങ് റൂം പോലും തുറന്നിരുന്നില്ല.
നടപടികൾ കൈകാര്യം ചെയ്യുന്നതിൽ ഉദ്യോഗസ്ഥർക്ക് ഉണ്ടായ പരിചയകുറവാണ് വോട്ടിങ് മെഷീനുകൾ നൽകുവാൻ വൈകിയതിന് കാരണം എന്നും ആരോപണമുയർന്നു. തുടർന്ന് വരണാധികാരികളായ ജില്ലാ കളക്ടർ എസ് പ്രേം കിഷോർ ഐ എ എസ്, കോന്നി ഡി എഫ് ഓ ആയുഷ് കുമാർ കോറി എന്നിവർ സ്ഥലത്തെത്തി നടപടികൾ ഏകോപിപ്പിച്ചു. ഒരു മണിക്കൂറിനുള്ളിൽ പ്രശ്നം പരിഹരിക്കണം എന്നും പത്തനംതിട്ട ജില്ലാ കളക്ടർ ഉദ്യോഗസ്ഥർക്ക് നിർദേശം നൽകി. ഇതിന് ശേഷമാണ് നടപടികൾ പൂർത്തിയാക്കി വോട്ടിങ് സാമഗ്രികൾ വിതരണം ചെയ്തത്.
