തിരുവനന്തപുരം : ലോകായുക്ത നിയമഭേദഗതിക്കെതിരെ നിയസഭയില് പ്രതിപക്ഷം സമര്പ്പിച്ച അടിയന്തര പ്രമേയ നോട്ടീസ് തള്ളി. തുടര്ന്ന് പ്രകോപിതരായ പ്രതിപക്ഷം സഭയില് നിന്ന് ഇറങ്ങിപ്പോയി. ലോകായുക്ത അടക്കമുള്ള സംസ്ഥാനത്തെ അഴിമതി വിരുദ്ധ സംവിധാനങ്ങളെ ദുര്ബലപ്പെടുത്തുന്ന നടപടിയാണ് സര്ക്കാറിന്റെ ഭാഗത്തു നിന്ന് ഉണ്ടാകുന്നതെന്ന് അടിയന്തര പ്രമേയത്തിന് നോട്ടീസ് നല്കിയ സണ്ണി ജോസഫ് എം എല് എ പറഞ്ഞു. സഭ നിര്ത്തി വച്ച് ചര്ച്ച ചെയ്യണമെന്നും പ്രതിപക്ഷം ആവശ്യപ്പെട്ടു.
പ്രതിപക്ഷത്ത് തര്ക്കമുള്ളതിനാലാണ് വിഷയത്തില് നോട്ടിസ് നല്കിയതെന്ന് മറുപടി നല്കിയ നിയമമന്ത്രി പി.രാജീവ് പറഞ്ഞു. ലോക്പാല് നിയമം പാസാക്കിയിട്ടും നിയമനം നടത്താത്തവരാണ് ഓര്ഡിനന്സ് ചോദ്യം ചെയ്യുന്നതെന്നും രാജീവ് പരിഹസിച്ചു. മന്ത്രിയുടെ വിശദീകരണത്തിന്റെ അടിസ്ഥാനത്തില് സ്പീക്കര് പ്രമേയ അവതരണാനുമതി നിഷേധിക്കുകയായിരുന്നു.
