ലുധിയാന: ട്രാഫിക് പോലീസ് ഉദ്യോഗസ്ഥനെ ബോണറ്റില് വച്ച് ഒരു കിലോമീറ്ററോളം വലിച്ചിഴച്ച രണ്ട് പേര്ക്കെതിരെ കേസ്. പഞ്ചാബിലെ ലുധിയാനയിലാണ് സംഭവം. വാഹനപരിശോധനക്കിടെ കാര് നിര്ത്താന് ആവശ്യപ്പെട്ട ട്രാഫിക് പോലീസ് ഉദ്യോഗസ്ഥനെയാണ് ബോണറ്റില് വലിച്ചിഴച്ചത്. നഗരത്തിലെ മുനിസിപ്പല് കോര്പ്പറേഷന് ഓഫീസിനരികെ മാതാ റാണി ചൗകില് വ്യാഴാഴ്ച നടത്തിയ പരിശോധനക്കിടെയായിരുന്നു സംഭവം.
വൈകുന്നേരം നടത്തിയ പരിശോധനയ്ക്കിടെ ഹെഡ് കോണ്സ്റ്റബിള് ഹര്ദീപ് സിംഗ് വാഹനം നിര്ത്താന് ആവശ്യപ്പെട്ട് കൈ കാണിച്ചു. എന്നാല്, നിര്ത്തുന്നതിനു പകരം കാറ് പോലീസുകാരനെ ഇടിച്ചിട്ടു. ഇടിയുടെ ആഘാതത്തില് പോലീസ് ഉദ്യോഗസ്ഥന് കാറിന്റെ ബോണറ്റിലേക്ക് വീണു. തുടര്ന്ന് പോലീസുകാരനെ ബോണറ്റില് വച്ച് ഇവര് വാഹനമോടിച്ചുപോവുകയായിരുന്നു. വാഹനമോടിച്ചിരുന്നവര് രക്ഷപ്പെട്ടു. കാറിലുണ്ടായിരുന്ന രണ്ട് പേര്ക്കും ക്രിമിനല് പശ്ചാത്തലമുണ്ടെന്നും ഇരുവരെയും തിരിച്ചറിഞ്ഞെന്നും അധികൃതര് അറിയിച്ചു.
