ഡൽഹിയിലെ ഷൂ ഫാക്ടറിയിൽ വൻ തീപിടിത്തം ; 4 പേർക്ക് ദാരുണാന്ത്യം

ന്യൂഡൽഹി: ഡൽഹി മംഗോൾപുരി വ്യാവസായിക മേഖലയിലെ ഫേസ് വണ്ണിലുള്ള ഷൂ ഫാക്ടറിയിലുണ്ടായ വൻ തീപിടിത്തത്തിൽ നാലു പേർ മരിച്ചു. രണ്ടു പേർക്കു പരുക്കേറ്റു. ഇന്നലെ രാത്രി 9.30 ഓടെയാണു തീപിടിത്തമുണ്ടായത്. പോലീസും ഫയർഫോഴ്‌സും നടത്തിയ മണിക്കൂറുകൾ നീണ്ട പരിശ്രമത്തിനൊടുവിലാണു തീ നിയന്ത്രണവിധേയമാക്കിയത്. ഫാക്ടറിക്കുള്ളിൽ ബോധരഹിതരായ അവസ്ഥയിലായിരുന്ന ആറ് പേരെയാണ് രക്ഷാപ്രവർത്തകർ പുറത്തെത്തിച്ചത്. ഇവരെ ഉടൻ മംഗോൾപുരിയിലെ സഞ്ജയ് ഗാന്ധി മെമ്മോറിയൽ ആശുപത്രിയിൽ എത്തിച്ചെങ്കിലും നാല് പേർ അപ്പോഴേക്കും മരിച്ചിരുന്നു. മറ്റ് രണ്ട് പേർ നിലവിൽ തീവ്രപരിചരണ വിഭാഗത്തിൽ ചികിത്സയിലാണ്.

ഫാക്ടറിയുടെ ബേസ്‌മെന്റിൽനിന്നാണ് തീ പടർന്നതെന്ന് ഫയർ ഓഫിസർ എഡിഒ പരസ് കുമാർ പറഞ്ഞു. തീ മുകളിലത്തെ നിലകളിലേക്കു പടരാതെ ബേസ്‌മെന്റിൽ തന്നെ ഒതുക്കാൻ ഫയർഫോഴ്‌സിനു സാധിച്ചതാണു വലിയ ദുരന്തം ഒഴിവാക്കിയത്. എന്നാൽ പുക മുകളിലേക്കു പടരുകയായിരുന്നു. മൂന്നാം നിലയിലെ ഗോവണിപ്പടിയിൽനിന്ന് ഒരാളെയും നാലാം നിലയിൽനിന്ന് അഞ്ച് പേരെയും പുക ശ്വസിച്ച് ബോധരഹിതരായ നിലയിലാണ് കണ്ടെത്തിയത്. നിലവിൽ തീ പൂർണമായും അണച്ചിട്ടുണ്ടെന്നും അദ്ദേഹം പറഞ്ഞു.