ബിഎൽഎം സൊസൈറ്റി ; ചെയർമാൻ ആർ. പ്രേംകുമാറിന് ജാമ്യം

കൊച്ചി : ബിഎല്‍എം നിക്ഷേപ തട്ടിപ്പ് കേസില്‍  കമ്പനി ചെയര്‍മാന്‍ ആര്‍. പ്രേംകുമാറിന് ജാമ്യം. ഇന്നലെ രാവിലെ ചെന്നെയില്‍ അറസ്റ്റിലായ പ്രേംകുമാറിനെ ഇന്ന് കോഴിക്കോട് ഓഫീസില്‍ എത്തിച്ചതിനു ശേഷം ബീച്ച് ആശുപത്രിയില്‍ മെഡിക്കല്‍ പരിശോധനകള്‍ നടത്തി. തുടര്‍ന്ന് പ്രേംകുമാറിനെ കോടതിയില്‍ ഹാജരാക്കുകയായിരുന്നു.  തനിക്കെതിരെയുള്ളത് കള്ളക്കേസാണെന്നും കുറച്ചുപേര്‍ ചേര്‍ന്ന് നടത്തിയ ഗൂഢാലോചനയാണെന്നും  ജാമ്യം ലഭിച്ച് പുറത്തിറങ്ങിയ പ്രേംകുമാര്‍ മാധ്യമങ്ങളോട് പറഞ്ഞു. ബിഎല്‍എമ്മിനെ തകര്‍ക്കാന്‍ കഴിയില്ലെന്നും നിക്ഷേപകര്‍ക്ക് തന്നെ വളരെ നന്നായി അറിയാമെന്നും അദ്ദേഹം വ്യക്തമാക്കി.

നിക്ഷേപകരുടെ പണം വകമാറ്റി സ്വകാര്യ ആവശ്യത്തിന് ഉപയോഗിച്ചെന്ന കേസില്‍ കഴിഞ്ഞ ദിവസമാണ് പ്രേംകുമാര്‍ അറസ്റ്റിലായത്. കോഴിക്കോട് നിന്നുള്ള ക്രൈംബ്രാഞ്ച് സംഘം ചെന്നൈയിലെത്തിയാണ് പ്രേംകുമാറിനെ അറസ്റ്റ് ചെയ്തത്. ബിഎല്‍എം ഹൗസിങ് കോഓപ്പറേറ്റീവ് സൊസൈറ്റിയുടെ പേരില്‍ പിരിച്ച പണം സ്വകാര്യ ആവശ്യങ്ങള്‍ക്കായി ഉപയോഗിക്കുകയും നിക്ഷേപിക്കുകയും ചെയ്തുവെന്നതാണ് പ്രധാന ആരോപണം. ഏകദേശം 5000 കോടി രൂപയുടെ ഫണ്ടാണ് ഇത്തരത്തില്‍ കൈകാര്യം ചെയ്തത്. നിരന്തരമായ പരാതികള്‍ ഉയര്‍ന്നതിനെ തുടര്‍ന്ന് ക്രൈം ബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗം അന്വേഷണം നടത്തുകയായിരുന്നു.