ന്യൂഡല്ഹി : മെയ്ക്ക് ഇന് ഇന്ത്യ വഴി അടിയന്തര ആയുധങ്ങള് വാങ്ങാന് പ്രതിരോധ സേനക്ക് അനുമതി നല്കി സര്ക്കാര്. തിങ്കളാഴ്ച രാവിലെ പ്രതിരോധ മന്ത്രാലയത്തിന്റെ യോഗത്തിലാണ് തീരുമാനം. മെയ്ക്ക് ഇന് ഇന്ത്യ വഴി മാത്രമേ സേനക്ക് ആയുധങ്ങള് വാങ്ങാന് സാധിക്കൂ എന്ന് ഉന്നത സര്ക്കാര് വൃത്തങ്ങള് അറിയിച്ചു. പ്രതിരോധ മന്ത്രി രാജ്നാഥ് സിംഗിന്റെ നേതൃത്വത്തിലാണ് യോഗം നടന്നത്.
ഇങ്ങനെ വാങ്ങുന്ന ആയുധങ്ങള് മൂന്ന് മാസത്തിനുള്ളിലോ ഒരു വര്ഷത്തിനുള്ളിലോ സേനക്ക് ലഭിക്കും. അതേസമയം, പുതിയ ആയുധങ്ങള് വാങ്ങാന് സായുധ സേനകള് അവരുടെ സ്വന്തം ബജറ്റ് വിഹിതത്തില് നിന്ന് പണം ചെലവഴിക്കേണ്ടതുണ്ടെന്നും ഈ ഇടപാടുകള്ക്ക് പ്രതിരോധ മന്ത്രാലയത്തിന്റെ അനുമതി വാങ്ങേണ്ടതില്ലെന്നും വൃത്തങ്ങള് അറിയിച്ചു.
പുതിയ പദ്ധതിയുടെ ഭാഗമായി വ്യോമസേനക്കും സൈന്യത്തിനും ‘ഹെറോണ്’ ആളില്ലാ വിമാനങ്ങള് ലഭിച്ചു. ഇത് ചൈനീസ് പ്രവര്ത്തനങ്ങള് നിരീക്ഷിക്കുന്നതിനായി ലഡാക്കിലും വടക്കുകിഴക്കന് പ്രദേശങ്ങളിലും നിരീക്ഷണത്തിനായി വിന്യസിച്ചിരിക്കുകയാണ്. ദീര്ഘദൂരങ്ങളില് നിന്ന് കരയിലെ ലക്ഷ്യസ്ഥാനത്തെത്താന് കഴിയുന്ന മിസൈലുകളും സൈന്യത്തിന് ലഭിച്ചിട്ടുണ്ട്. ബങ്കറുകള് പോലെയുള്ള കഠിനമായ ഭൂതല ലക്ഷ്യങ്ങളെ ദൂരെ നിന്ന് ആക്രമിക്കാന് കഴിയുന്ന ഹാമര് മിസൈലുകള് ഘടിപ്പിച്ചതോടെ റാഫേല് യുദ്ധവിമാനങ്ങള്ക്കും ഉത്തേജനം ലഭിച്ചിരിക്കുകയാണ്.
