പാലക്കാട്: നടിയും നര്ത്തകിയുമായ മാളവികയുടെ പാലക്കാട് ഞാങ്ങാട്ടിരിയിലെ വീട്ടില് മോഷണം. ഒന്നര ലക്ഷം രൂപ വില വരുന്ന വാച്ച് ഉള്പ്പെടെ വിലപിടിപ്പുള്ള സാധനങ്ങള് കവര്ന്നു. മോഷ്ടാവിന്റെ ദൃശ്യങ്ങള് തൊട്ടടുത്ത വീട്ടിലെ സിസിടിവിയില് പതിഞ്ഞിട്ടുണ്ട്. മാളവികയും കുടുംബവും വീട്ടിലില്ലാതിരുന്ന സമയത്താണ് ഞാങ്ങാട്ടിരി വി കെ കടവ് റോഡിലെ വീട്ടില് മോഷണം നടന്നത്. രാവിലെ ജോലിക്കാരി എത്തി വീട് തുറന്നപ്പോഴാണ് മോഷണ വിവരം അറിയുന്നത്. കിടപ്പുമുറിയിലെയും അടുക്കളയിലെയും സാധനങ്ങള് വലിച്ചുവാരി ഇട്ട നിലയിലാണ്.
സ്വര്ണ്ണവും പണവും വീട്ടില് വച്ചിരുന്നില്ല എന്നതിനാല് ഇത് നഷ്ടമായില്ല. ഡോഗ് സ്ക്വാഡ് സ്ഥലത്തെത്തി പരിശോധന നടത്തി. മാളവികയുടെ വീടിന് ചുറ്റും സഞ്ചരിച്ച നായ സമീപത്തെ മറ്റൊരു വീട്ടിലുമെത്തി. പിന്നീട് സമീപത്തെ പുഴയോരത്തുള്ള ആളൊഴിഞ്ഞ പറമ്പിലെത്തി നിന്നു. മോഷ്ടാവ് വീട് കുത്തിത്തുറക്കാന് ഉപയോഗിച്ച ഇരുമ്പ് ദണ്ഡും, ഉളിയും വീടിന്റെ പരിസരത്ത് ഉപേക്ഷിച്ച നിലയില് കണ്ടെത്തി. ഇതില് ഇരുമ്പ് ദണ്ഡ് സമീപത്തെ ഹോളോ ബ്രിക്സ് കടയില് നിന്നും മോഷ്ടിച്ചതാണെന്ന് വ്യക്തമായി. റെയില് കോട്ട് ധരിച്ച് മുഖം തോര്ത്ത് ഉപയോഗിച്ച് മറച്ച മോഷ്ടാവിന്റെ ദൃശ്യങ്ങള് തൊട്ടടുത്ത വീട്ടിലെ സിസിടിവി ക്യാമറയില് പതിഞ്ഞിട്ടുമുണ്ട്.
