മാവേലിക്കര: ദുരിതാശ്വാസ പ്രവര്ത്തനത്തിന്റെ ഭാഗമായുള്ള റോഡ് നിർമ്മാണത്തിനിടെ മലയാളി ജവാന് ഉത്തരാഖണ്ഡില് വീരമൃത്യു. ഓപ്പറേറ്റിങ് എക്യുപ്മെന്റ് മെക്കാനിക്ക്, മാവേലിക്കര ചെട്ടികുളങ്ങര പഞ്ചായത്ത് എട്ടാം വാഡിൽ ഈരേഴ തെക്ക് താനുവേലിൽ വീട്ടിൽ ബാബുവിന്റെയും സരസ്വതിയുടെയും മകന് ബി ബിജു (42) ആണ് മരിച്ചത്.
വ്യാഴം പകൽ രണ്ടിനായിരുന്നു അപകടം. പിത്രോഗാഡിന് സമീപം ഇന്ത്യാ-ചൈനാ ബോർഡർ റോഡ് നിർമ്മാണത്തിനിടെ ബിജു നിയന്ത്രിച്ചുകൊണ്ടിരുന്ന എക്സ്കവേറ്ററിന് മുകളിലേക്ക് വലിയ പാറ വീഴുകയായിരുന്നു. എക്സ്കവേറ്റർ തൊട്ടടുത്തുള്ള നദിയുടെ തീരത്തേക്ക് മറിഞ്ഞ് തകർന്നു. അപകട സ്ഥലത്തുതന്നെ മരിച്ച ബിജുവിന്റെ മൃതദേഹം സഹപ്രവർത്തകർ ചുമന്നെടുത്താണ് റോഡിലെത്തിച്ചത്. പിത്രോഗാഡ് സിവിൽ ആശുപത്രിയിലുള്ള മൃതദേഹം പോസ്റ്റ് മോർട്ടത്തിനും തുടർ നടപടികൾക്കും ശേഷം റോഡ് മാർഗം ഡൽഹിയിലെത്തിക്കും. ഇവിടെ നിന്ന് വിമാന മാർഗം നാട്ടിലെത്തിക്കുമെന്ന് ബന്ധുക്കൾ അറിയിച്ചു. അരുണാചൽ പ്രദേശിൽ ജോലി ചെയ്തു വന്നിരുന്ന ബിജു, ആറുമാസങ്ങൾക്കു മുമ്പാണ് ഒടുവിൽ അവധിക്ക് നാട്ടിലെത്തിയത്.
