റാന്നി : കുഴഞ്ഞു വീണു റോഡരികില് കിടന്ന മദ്യപന് സൂര്യാഘാതമേറ്റു മരിച്ചു.
അങ്ങാടി മേനാംതോട്ടം സ്വദേശി മേപ്പുറത്ത് സണ്ണിതോമസ് (64) ആണ് മരിച്ചത്. റാന്നി ഇട്ടിയപ്പാറ കോളേജ് റോഡിലെ ബാര് ഹോട്ടലിനു സമീപമാണ് സംഭവം. ഇന്നു രാവിലെ ഒന്പതു മണിയോടെയാണ് ഇയാള് റോഡരികില് മദ്യപിച്ചെത്തി വീഴുന്നത്. മദ്യപിച്ചു വീണു കിടക്കുന്നതിനാല് ആരും തിരിഞ്ഞു നോക്കിയുമില്ല. പിന്നീട് സമയം അധികരിച്ചിട്ടും ഇയാള് എഴുന്നേറ്റു പോകാതായതോടെ സമീപത്തെ വ്യാപാരികള് വിവരം റാന്നിയിലെ അഗ്നിശമന സേന വിഭാഗത്തെ അറിയിക്കുകയായിരുന്നു.
പിന്നീട് ഒരു മണിക്കൂറോളം സമയം കഴിഞ്ഞ് റാന്നി പോലീസ് വിവരമറിഞ്ഞ് സ്ഥലത്തെത്തിയെങ്കിലും സണ്ണി അപ്പോഴത്തേക്കും മരിച്ചിരുന്നു. ചൂടു കനത്തോടെ ശരീരത്തിലെ ജലാംശം നഷ്ടപ്പെട്ടതാകാം മരണ കാരണമെന്നാണ് നിഗമനം. മൃതദേഹം പോസ്റ്റുമോര്ട്ടത്തിനായി റാന്നിയിലെ സ്വകാര്യ ആശുപത്രി മോര്ച്ചറിയിലേയ്ക്ക് മാറ്റി.
