കോട്ടയം: മണര്കാട്ടെ ചീട്ടുകളി ക്ലബ് നടത്തിപ്പുകാരന് മാലം സുരേഷിന്റെ ആഡംബര വീട്ടില് സി.പി.എം. പോളിറ്റ് ബ്യൂറോ അംഗം എം.എ. ബേബി സന്ദര്ശനം നടത്തിയതു സംബന്ധിച്ചു പാര്ട്ടി നേതൃത്വം അന്വേഷണം ആരംഭിച്ചു.
മണര്കാട് ക്രൗണ് ക്ലബിലെ ചീട്ടുകളിയുമായി ബന്ധപ്പെട്ട് അന്വേഷണം നേരിടുന്നയാളോടൊപ്പം നില്ക്കുന്ന എം.എ. ബേബിയുടെ ചിത്രം കഴിഞ്ഞ ദിവസം പുറത്തു വന്നതു പാര്ട്ടിയില് വന് വിവാദത്തിനു വഴിവെച്ചിരുന്നു. ഇതേത്തുടര്ന്നാണ് സി.പി.എം. നേതൃത്വം അന്വേഷണം തുടങ്ങിയത്. വിവാദ പശ്ചാത്തലമുള്ളയാളുടെ വീട്ടില് എന്തിനു പോയി, ആരാണ് മാലം സുരേഷിന്റെ വീട്ടിലെത്തിച്ചത്? തുടങ്ങിയ കാര്യങ്ങള് പാര്ട്ടി അന്വേഷിക്കും.
ക്രൗണ് ക്ലബ്ബിലെ ചീട്ടുകളിയുമായി ബന്ധപ്പെട്ട് പോലീസ് കേസെടുത്ത മാലം സുരേഷിനെ നേരത്തെയുണ്ടായ പ്രശ്നത്തില്നിന്നു രക്ഷിക്കണം എന്നാവശ്യപ്പെട്ട് മൈലാപ്പൂര് ബിഷപ്പ് സി.പി.എം. നേതാക്കളുടെ സഹായമഭ്യര്ഥിച്ച് അയച്ച കത്ത് പുറത്തുവന്നതും പാര്ട്ടിയില് ചര്ച്ചയായിരുന്നു. മൈലാപ്പൂര് ആര്ച്ച് ബിഷപ് ഡോ.എ.എം. ചിന്നപ്പയാണ് 2017-ല് മധ്യകേരളത്തിലെ ഒരു വൈദിക ശ്രേഷ്ഠനു കത്തയച്ചത്. സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന്, കണ്ണൂരില്നിന്നുള്ള ഒരു മന്ത്രി എന്നിവരെ കണ്ടു പ്രശ്നം തീര്ക്കാന് ഇടപെടണമെന്ന് അഭ്യര്ഥിച്ചായിരുന്നു കത്ത്.