മണിപ്പൂര് : മണിപ്പൂര് ബിജെപി അധ്യക്ഷന് കൊവിഡ് ബാധിച്ചു മരിച്ചു. എസ് ടികേന്ദ്ര സിംഗാണ് മരിച്ചത്. ഇംഫാലിലെ ഷൈജ ആശുപത്രിയില് ചികിത്സയില് കഴിയവെയാണ് മരണം. നിരവധി പേര് ടികേന്ദ്ര സിംഗിന്റെ അപ്രതീക്ഷിത വിയോഗത്തില് അനുശോചനം അറിയിച്ചു.അദ്ദേഹം മണിപ്പൂരില് ബിജെപിയെ ശക്തിപ്പെടുത്തുന്നതില് വലിയ പങ്കുവഹിച്ചിട്ടുണ്ടെന്ന് ബിജെപി ദേശീയാധ്യക്ഷന് ജെപി നദ്ദ പറഞ്ഞു.
രാജ്യത്തെ കൊവിഡ്-19 സാഹചര്യം ദിനം പ്രതി രൂക്ഷമാവുകയാണ്. ഇക്കഴിഞ്ഞ 24 മണിക്കൂറിനിടെ രാജ്യത്ത് 3,62,727 പേര്ക്കാണ് കൊവിഡ് സ്ഥിരീകരിച്ചത്. ഇതോടെ രാജ്യത്തെ ആകെ കൊവിഡ് ബാധിതര് 2.37 കോടി കടന്നു. ആകെ രോഗബാധിതരില് 1.97 കോടിയിലേറേ പേര് ഇതിനോടകം രോഗമുക്തരായി. കഴിഞ്ഞ 24 മണിക്കൂറിനിടെ മാത്രം 3,52,181 പേര് രോഗമുക്തി നേടി. വിവിധ സംസ്ഥാനങ്ങളിലായി 37,10,525 പേരാണ് നിലവില് ചികിത്സയില് തുടരുന്നത്. 2,58,317 പേരുടെ ജീവന് ഇതുവരെ കോവിഡ് കവര്ന്നു.