മണിപ്പൂര്: മണിപ്പൂരില് അഞ്ച് ദിവസത്തേക്ക് ഇന്റര്നെറ്റ് സേവനം നിര്ത്തിവെച്ചു. സ്പെഷ്യല് സെക്രട്ടറി (ആഭ്യന്തര) എച്ച് ഗ്യാന് പ്രകാശ് ഇത് സംബന്ധിച്ച് ഉത്തരവിറക്കി.ചില സാമൂഹിക വിരുദ്ധര് പൊതുജനങ്ങളുടെ വികാരം ഇളക്കിവിടുന്ന വിദ്വേഷ പ്രസംഗങ്ങള് പ്രചരിപ്പിക്കാന് സോഷ്യല് മീഡിയ ഉപയോഗിക്കുന്നുണ്ടെന്ന് ഉത്തരവില് പറയുന്നു. ഇത് വര്ഗീയ സംഘര്ഷം സൃഷ്ടിക്കുമെന്നും ചൂണ്ടിക്കാട്ടുന്നു. കഴിഞ്ഞ ദിവസം ഫുഗ്കാചാവോ ഇഖാങ്ങില് 4 പേര് ചേര്ന്ന് ഒരു വാഹനത്തിന് തീയിട്ടു. ഇത് സാമുദായിക സംഘര്ഷം വര്ധിച്ചതായി കാണിച്ചുകൊണ്ട് വിഷ്ണുപൂര് ജില്ലയിലെ പോലീസ് സൂപ്രണ്ട് റിപ്പോര്ട്ട് സമര്പ്പിച്ചിരുന്നു. തുടര്ന്നാണ് സ്പെഷ്യല് സെക്രട്ടറിയുടെ ഉത്തരവ്. വിഷ്ണുപൂര്, ചുരാചന്ദ്പൂര് ജില്ലകളില് സിആര്പിസി സെക്ഷന് 144 പ്രകാരം നിരോധനാജ്ഞ ഏര്പ്പെടുത്തിയിട്ടുണ്ട്. ശനിയാഴ്ച വൈകുന്നേരം മുതല് രണ്ട് മാസത്തേക്ക് ഈ ഉത്തരവ് നിലവില് വന്നു.
ഓള് ട്രൈബല് സ്റ്റുഡന്റ് യൂണിയന് മണിപ്പൂര് (ATSUM) വെള്ളിയാഴ്ച ദേശീയ പാതകളില് അനിശ്ചിതകാല സാമ്പത്തിക ഉപരോധ സമരം ആരംഭിച്ചതിനെ തുടര്ന്ന് സംസ്ഥാനത്ത് സംഘര്ഷാവസ്ഥ നിലനില്ക്കുകയാണ്. മണിപ്പൂര് (ഹില് ഏരിയ) സ്വയംഭരണ ജില്ലാ കൗണ്സില് ബില് 2021 നിയമസഭയില് അവതരിപ്പിക്കണമെന്ന് വിദ്യാര്ത്ഥി സംഘടന ആവശ്യപ്പെടുന്നു. താഴ്വര പ്രദേശങ്ങളുടെ വികസനത്തിന് ഇത് കൂടുതല് സാമ്പത്തികവും ഭരണപരവുമായ സ്വയംഭരണം നല്കുമെന്ന് ഓള് ട്രൈബല് സ്റ്റുഡന്റ് യൂണിയന് മണിപ്പൂര് പറയുന്നു.