മഞ്ചേരി : മഞ്ചേരി, കൊല്ലം പാരിപ്പള്ളി നഴ്സിങ് കോളേജുകളില് ഈ അധ്യയനവര്ഷം മുതല് ക്ലാസുകള് ആരംഭിക്കും. ഇതിന്റെ ഭാഗമായി സൗകര്യങ്ങള് വിലയിരുത്താന് സ്പെഷല് ഓഫിസറുടെ നേതൃത്വത്തിലുള്ള മൂന്നംഗ സംഘം മഞ്ചേരിയിലും പാരിപ്പള്ളിയിലും സന്ദര്ശനം നടത്തി. വെള്ളിയാഴ്ച രാവിലെ പത്തോടെയാണ് സംഘം മഞ്ചേരിയിലെത്തിയത്. മഞ്ചേരി മെഡിക്കല് കോളേജുകളില് നഴ്സിങ് കോളേജും സ്ഥാപിക്കുമെന്ന് 2020 ലെ ബജറ്റില് പ്രഖ്യാപിച്ചിരുന്നു.
രണ്ടു കോളേജുകളിലായി 120 പേര്ക്കാണ് പ്രവേശനം നല്കുക. ആദ്യവര്ഷം രണ്ടിടങ്ങളിലും താല്ക്കാലിക കെട്ടിടത്തില് ക്ലാസുകള് ആരംഭിക്കാനാണ് ശ്രമം. മൂന്ന് വര്ഷത്തിനുള്ളില് ആധുനിക സൗകര്യത്തോടെ കെട്ടിട സമുച്ചയങ്ങള് സജ്ജമാക്കും. ഇതിനായി മൂന്നേക്കര് സ്ഥലം ഏറ്റെടുക്കും. പ്രിന്സിപ്പല്, പ്രഫസര്, അഞ്ച് അസോസിയേറ്റ് പ്രഫസര് ഉള്പ്പെടെ ജീവനക്കാരുടെ തസ്തികകള് സൃഷ്ടിക്കും. താമസത്തിന് കോളേജിന് പുറത്ത് സൗകര്യം കണ്ടെത്തും.
ഒക്ടോബറില് ക്ലാസുകള് ആരംഭിക്കാനാകുമെന്ന് പ്രതീക്ഷിക്കുന്നതായി സ്പെഷ്യല് ഓഫിസര് ഡോ.സലീന ഷാ പറഞ്ഞു. പരിശോധന റിപ്പോര്ട്ട് അടുത്തദിവസം മെഡിക്കല് വിദ്യാഭ്യാസ ഡയറക്ടര് മുഖാന്തരം സര്ക്കാറിന് കൈമാറും. ക്ലാസുകള് ആരംഭിക്കാന് കേന്ദ്ര, സംസ്ഥാന, ആരോഗ്യ സര്വകലാശാലകളുടെ അംഗീകാരം നേടാനുള്ള നടപടി ആരംഭിച്ചു. ജോയന്റ് ഡയറക്ടര് ഓഫ് നഴ്സിങ് ഡോ.ആര്.ബിന്സി, ഡി.എം.ഇ പ്ലാനിങ് ഓഫിസര് കുഞ്ഞിമുഹമ്മദ് എന്നിവരും സംഘത്തിലുണ്ടായിരുന്നു. സന്ദര്ശനശേഷം മെഡിക്കല് കോളേജ് പ്രിന്സിപ്പല് ഡോ.സിറിയക് ജോബ്, സൂപ്രണ്ട് ഡോ.കെ.വി നന്ദകുമാര് എന്നിവരുമായി ചര്ച്ചനടത്തി.