കണ്ണൂര്: കുറുമാത്തൂരില് വന് ചന്ദന വേട്ട. തളിപ്പറമ്പ് ഫോറസ്റ്റ് റേഞ്ച് സംഘം നടത്തിയ പരിശോധനയില് 390 കിലോ ചന്ദനം പിടിച്ചെടുത്തു. ചന്ദനം മുറിച്ചു കടത്താന് ശ്രമിച്ച സംഘത്തിലെ ഒരാള് പിടിയിലായി. രണ്ടു പേര് ഓടി രക്ഷപ്പെട്ടു. കണ്ണൂര്, കുറുമാത്തൂര് കൂനം റോഡിലെ ആളൊഴിഞ്ഞ പുരയിടത്തില് താല്ക്കാലിക ഷെഡില് സംഭരിച്ച 390 കിലോയോളം ചന്ദനമാണ് പിടികൂടിയത്. വനം വകുപ്പ് ഉദ്യോഗസ്ഥര്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പരിശോധന നടത്തിയത്.
കുറുമാത്തൂര് സ്വദേശി എം.മധുസൂദനനെ വനം വകുപ്പ് സംഘം പിടികൂടി. ചെത്തി ഒരുക്കി വില്പ്പനക്ക് തയ്യാറാക്കിയ 6 കിലോ ചന്ദന മുട്ടികളും മുറിച്ചു വെച്ച 110 കിലോഗ്രാം ചന്ദന മരത്തടികളും 275 കിലോഗ്രാം ചന്ദനപ്പൂളുമുള്പ്പെടെ 390 കിലോയിലധികം ചന്ദനമാണ് പിടികൂടിയത്. ശ്രീകണ്ഠാപുരം സ്വദേശികളായ നിസാര്, ദിലീപന് എന്നിവരാണ് ഓടി രക്ഷപ്പെട്ടത്. ഇവരെ കണ്ടെത്താന് ശ്രമം തുടങ്ങിയതായി തളിപ്പറമ്പ് റെയ്ഞ്ച് ഫോറസ്റ്റ് ഓഫീസര് വ്യക്തമാക്കി.
കൊയ്യം പാറക്കാടി സ്വദേശി വീരപ്പന് ഹൈദ്രോസ് എന്നയാള്ക്കാണ് ഇവര് ചന്ദന മുട്ടികള് വില്പ്പന നടത്തിയിരുന്നതെന്നാണ് കണ്ടെത്തല്. ചന്ദനം മുറിക്കാനുപയോഗിച്ച ആയുധങ്ങളും കസ്റ്റഡിയിലെടുത്തു. തളിപ്പറമ്പ് റെയ്ഞ്ച് ഫോറസ്റ്റ് ഓഫീസര് പി.രതീശന്റെ നേതൃത്വത്തിലുള്ള സംഘമാണ് ചന്ദനം പിടികൂടിയത്.
