തിരുവനന്തപുരം: യുഡിഎഫിനും ബിജെപിക്കും മുമ്പ് തിരുവനന്തപുരം കോര്പ്പറേഷനിലെ സ്ഥാനാര്ത്ഥികളെ പ്രഖ്യാപിക്കാന് എല്ഡിഎഫ്. മേയര് സ്ഥാനത്തേക്ക് സിപിഎം ജില്ലാകമ്മിറ്റി അംഗങ്ങളായ എം ജി മീനാംബികയും, പുഷ്പലതയുമാണ് പരിഗണനയില്. പല ജനറല് സീറ്റുകളിലും വനിതകളെ നിര്ത്താനാണ് സിപിഎം നീക്കം.
സംസ്ഥാനത്തെ വാശിയേറിയ ത്രികോണ പോരാട്ടം നടക്കുന്ന തിരുവനന്തപുരം നഗരസഭയില് സ്ഥാനാര്ത്ഥികളെ തെരഞ്ഞെടുപ്പ് പ്രഖ്യാപനത്തിന് മുമ്പ് തന്നെ രംഗത്തിറിക്കുകയാണ് സിപിഎം. ചൊവ്വാഴ്ചക്കകം സ്ഥാനാര്ത്ഥി പട്ടികക്ക് രൂപം നല്കും. 100 സീറ്റുകളുള്ള നഗരസഭയില് 72സീറ്റുകളില് സിപിഎം മത്സരിക്കാനാണ് ധാരണ. പുതുതായി മുന്നണിയിലെത്തിയ ജോസ് വിഭാഗത്തിനും മൂന്ന് സീറ്റ് നല്കിയേക്കും.
2015ല് മേയര് സ്ഥാനം ഉറപ്പിച്ച് രംഗത്തിറങ്ങിയ ജില്ലാ നേതാക്കള് പരാജയപ്പെട്ടിരുന്നു. ഈ സാഹചര്യത്തില് ഒന്നിലധികം ജില്ലാ നേതാക്കളെ ഇത്തവണ സിപിഎം രംഗത്തിറക്കും. രണ്ട് ജില്ലാ കമ്മിറ്റി അംഗങ്ങളാണ് പരിഗണനയില്. നിലവിലെ സ്റ്റാന്ഡിംഗ് കമ്മിറ്റി അദ്ധ്യക്ഷയായ പുഷ്പലതയും മഹിളാ അസോസിയേഷന് കേന്ദ്രകമ്മിറ്റി അംഗം എം ജി മീനാംബികയും.
