തിരുവനന്തപുരം: ബിഷപ്പിനെതിരെ മന്ത്രി എംബി രാജേഷ്. റബര് വില വര്ധിപ്പിച്ചാല് ബിജെപിയെ സഹായിക്കാമെന്ന ബിഷപ് പാംബ്ലാനിയുടെ പ്രസ്താവനയ്ക്കെതിരെയാണ് അദ്ദേഹം രംഗത്തെത്തിയിരിക്കുന്നത്. ആര്എസ്എസും ബിജെപിയും ന്യൂനപക്ഷ സംരക്ഷകരായി വരികയാണെന്നും മന്ത്രി പറഞ്ഞു. കുറുക്കന് ഒരിക്കലും കോഴിയെ സംരക്ഷിച്ച ചരിത്രമില്ലെന്നും മന്ത്രി പരിഹസിച്ചു. ആര് എസ് എസിന്റെ വിചാരധാരയില് മുസ്ലീങ്ങളും, ക്രൈസ്തവരും കമ്മ്യൂണിസ്റ്റുകളുമാണ് ശത്രുക്കളെന്നും അദ്ദേഹം വ്യക്തമാക്കി.
കേന്ദ്ര സര്ക്കാര് റബ്ബറിന് മുന്നൂറ് രൂപ തറവില പ്രഖ്യാപിച്ചാല് തെരഞ്ഞെടുപ്പില് ബി ജെ പിയെ സഹായിക്കുമെനന്നായിരുന്നു തലശേരി ആര്ച്ച് ബിഷപ്പ് ജോസഫ് പാപ്ലാനിയുടെ പ്രസ്താവന. റബ്ബറിന്റെ ഇറക്കുമതി തീരുവയെ കുറിച്ച് തീരുമാനമെടുക്കുകയും റബ്ബറിന്റെ വില 300 രൂപയാക്കുകയും ചെയ്താല് കേന്ദ്ര സര്ക്കാരിനെ പിന്തുണയ്ക്കാന് ഇവിടുത്തെ മലയോര കര്ഷകര് തയ്യാറാകുമെന്നാണ് ബിഷപ്പ് പറഞ്ഞത്. അതായത് റബര് പ്രശ്നം പരിഹരിച്ചാല് കേരളത്തില് നിന്നും തങ്ങള്ക്ക് എംപിമാരില്ലെന്ന വിഷമം മലയോര ജനത മാറ്റും എന്ന് തന്നെയാണ് ബിഷപ്പ് അര്ത്ഥമാക്കിയത്.