ആറ്റിങ്ങല് : മാനസിക വെല്ലുവിളി നേരിടുന്ന പതിനഞ്ചുകാരിയെ പീഡിപ്പിച്ച സംഭവത്തില് 60കാരന് 20 വര്ഷം കഠിനതടവും ഒരു ലക്ഷം രൂപ പിഴയും ശിക്ഷ വിധിച്ചു. ആറ്റിങ്ങല് ഫാസ്റ്റ് ട്രാക്ക് (പോക്സോ) കോടതിയാണ് ശിക്ഷ വിധിച്ചത്. ഇടവ പാറയില് സ്വദേശി രവിചന്ദ്രനാണ് (60) പതിനഞ്ചുവയസ്സുകാരിയെ പീഡിപ്പിച്ചത്. പിഴത്തുകയില് 25,000 രൂപ കുട്ടിയുടെ അമ്മയ്ക്ക് നല്കാനും കോടതി വിധിച്ചിട്ടുണ്ട്. 2017 ഒക്ടോബറിലായിരുന്നു കേസിനാസ്പദമായ സംഭവം.
കടയില് പോയി സാധനങ്ങള് വാങ്ങി മടങ്ങിവരികയായിരുന്ന പെണ്കുട്ടിയെ രവിചന്ദ്രന് വീട്ടിലേക്ക് വലിച്ചിഴച്ച് കൊണ്ടുപോയി കണ്ണും കയ്യും കെട്ടിയ ശേഷം പീഡിപ്പിക്കുകയായിരുന്നു. സംഭവം നടന്ന് മാസങ്ങള്ക്ക് ശേഷം വിചാരണയ്ക്ക് മുന്പ് പെണ്കുട്ടി ജീവനൊടുക്കി. സാഹചര്യത്തെളിവുകളുടേയും മൊഴികളുടേയും അടിസ്ഥാനത്തില് പ്രതി കുറ്റക്കാരനാണെന്ന് കണ്ടെത്തുകയായിരുന്നു.
